Mizoram-a buhfai phurhluh zung zung dan tur sawiho

Supply Minister, K. Lalrinliana ruahmanna in Mizoram-a buhfai phurhluh zung zung a nih theih dan tur sawihona nimin khan neih niin ruahmanna hrang hrang siam a ni.
He sawihona hi HL. Rochungnunga, IAS, Commissioner & Secretary, FCS&CA Department chuan kaihruaiin Food Corporation of India (FCI), Mizoram Truck Owners’ Association (MTOA), Mizoram Truck Drivers' Association (MTDA) leh Carrying contractors ten buhfai phurh chungchanga an harsatna tawh te ngaihthlak a nih hnuah ruahmanna siam a ni a, ruahmanna an siam dan chuan Bairabi Rail Station-a buhfai Wagon 21 awm mek leh Wagon 29 lo thleng thar unload chu a phurtu Truck tam thei ang berin an dawh theih tura hawn tura tih a ni a. FCI in tunlai boruak avangin chhawr tur mi leh sa an neih tlem avangin unload lai a buhfai bothlau tur lo veng a, vil tur Security Force dah turin Mizoram sawrkar ngen a ni bawk ang.
Tun dinhmunah chuan Mizoram-a buhfai phurh hna hi MTOA leh MTDA member ni lo pawh thawh phalsak an ni a. Tipper neitute pawh buhfai phur tur hian ngen niin Truck khalhtute leh a neitute hian POL leh sum lakchhuah chungchanga an veivahna ah Local Task Force leh Police lam atangin harsatna an tawh loh nan Local News channel-ten Essential Commodities kaihhnawih a duty an nih avanga ngaihhnathiam an nih thu uar lehzual a puang turin ngen nise an ti a. Buhfai lo thleng leh zel tur inhnawhkhawm tur ven nan tuna Bairabi Rail Station-a buhfai Wagon 29 awm mek chu FCI Food Storage Depot, Rengtekawn leh Bualpui-ah dah vek tura tih a ni bawk.
Hei bakah hian Pradhan Mantri Garib Kalyan Anna Yojana (PM-GKAY) hnuaia AAY leh PHH-te tan thla thum (3) chhung mi pakhat tan buhfai Kg. 5 a thlawna sem tura FCI leh Supply Department inbuatsaihna chu a that tawk thu leh harsatna awmlo tura ngaih a nih thu tarlan a ni bawk.

Comments

Chhiar Hlawhte