Ramchhunga MP te hlawh zaa 30-in tihniam dawn

Central Minister leh MP-te hlawh zaa 30-a kum khat chhung tihhniamna tur Ordinance chu Union Cabinet chuan nimin khan a pawm a, Salary, Allowances & Pension of Members of Parliament Act, 1954 siamthat hi tun thla ni 1 atanga hman tan tur a ni.

Nimin a Cabinet thutlukna hi thuthar lakhawmtute hnenah puangin Information & Broadcasting Minister, Prakash Javadekar-a chuan Union Minister leh MP-te hlawh chu kum khat chhung zaa 30-a tihhniam a ni ang, a ti. MP-ten an bial chhunga hmasawnna hna thawhna tur sum an dawn thin, MPLAD Fund pawh kum 2020-2021 atanga 2021-2022, kum hnih chhung tih tawp lailawk a nih thu pawh sawiin, hemi avanga sum tlingkhawm cheng vbc. 7900 chu COVID-19 dona Fund-ah chhunluh a ni ang, a ti.

Prakash Javadekar chuan President, Vice President leh State Governor-te pawh anmahni duh thu ngeia kum khat chhung chu an hlawh zaa 30-a tihniam ve tura ngenin, an hlawh lak loh chu Consolidated Fund of India-ah a lut ang tih a sawi bawk.

Nimin vek khan Sikkim Governor, Ganga Prasad-a chuan kum khat chhunga a hlawh zaa 30-a chu Covid-19 dolet nan PM Cares Fund-ah a thawh dawn tih President Ram Nath Kovind-a hnenah lehkha thawnin a thlen a ni.