Chanchin thar thenkhat :

Vanduaina tawk te tanpui

Pathianni tlai khan Kolasib District chhunga thli leh ruah thawkin chenna In thenkhat tichhiain heng vanduaina tawk te hi Supply Minister leh Ko-lasib bialtu MLA, K. Lalrinliana aiawhin nimin khan an party hruaitu ten tanpuina an hlan a. Thli leh ruah thawk hian Pangbalkawn khua ah chenna In 8 tichhiain Rs. 3000/- theuh leh Silpouline pakhat theuh hlanin Kolasib Saidan-a chenna In pakhat chung thli in a lak pawh Rangva Bandle 4 leh hnatlang te thingpui inna tur Rs. 2000/- an hlan bawk a. Kolasib District thu neitute hnenah Sawrkar atanga tanpuina awm thei ang pek an nih theih nan a rang thei anga hma la turin a thlen sak nghal bawk a ni.

Mi 28 te chhuahtir an ni

Coronavirus leng mek avanga Kolasib District chhunga Quarantine Facility a khung hran mi 28 te chu ni 14 chhung ngun tak a enthlak an nih hnuah COVID-19 hri vei rinhleh awm tumah an awm lo tih finfiah niin nimin khan In lama haw tura chhuah an ni a, heng Quarantine hun hmang zo te hi Kolasib District mi 7, Aizawl District atangin mi 7, Lawngtlai District mi 8 leh Mamit District mi 6 te niin Tourist Lodge Quarantine Facility atangin mi 17, SIRD Quarantine Facility atangin mi 9 leh Vairengte Quarantine Facility atangin mi 2 an ni.

Hospital tan PPE Set hlan

Lungei North bialtu MLA leh Mizoram Youth Commission (MYC) Chairman, Dr. Vanlaltan-puia chuan nimin khan Christian Hospital, Serkawn a hman tur Personal Protective Equiptment (PPE) Set 200 chu Medical Superintendent, Dr. Lalramzauva hnenah a hlan a. Christian Hospital, Serkawn hian COVID-19 hrik kai awm palh thei ah ruahmanna tha tak siamin, Khum 12 chu damlo dang chimbuai loh-a COVID-19 nia rin-hlelhte awmna turin an ruahman a, hei bakah hian ICU an neih sa chu dah awlin, tunah hian ICU thar, Khum pahnih leh hmanrua chi hrang hrang bakah Ventilator te nen vek an dahfel tawh bawk.

Bialtu MLA lakah beidawng

Thorang bial chhunga MNF Block 4 te chuan thuchhuah intawm siamin tunhnaia hri leng avanga MLA hrang hrang ten an bial te chhuanchhama an awm hlau-a pawisa, buhfai, tui leh mamawh dangte pe-a Hand Sanitizer, Gloves, Mask leh thil dang dang pawh Village Level Task Force-ten mipui tan an sem laiin an bialtu MLA, Zodintluanga chuan a bial pawh fangchhuak lovin a khaw lian zual hmun chhete-ah pawisa tlem pein, Paracetamol (nachhawkna/damdawi) a sem ringawt tih an sawi a. Hei hi an ngaithiamlo hle tih sawiin, bial mipui hmuh-sitna leh thamlohna ah an ngaih thu leh an dem thu an sawi a, an bialtu MLA lakah an bei-dawng hle tih an sawi bawk.

Ngaihtuahna zau hman duh

Mizoram Pradesh Youth Congress Committee chuan COVID-19 in khawvel a nghawng mek ah Lockdown leh Curfew avangin mipui nunphung a danglam nasa hle tih sawiin, eitur nei lo chhuanchham chhungkua thahnem tak, Local Level Task Force (LLTF) leh Village Level Task Force (VLTF) ten an tanpui pawh vengtin, khaw tinah an awm nuk tawh tih an sawi a. Hei vang hian Lockdown hman lehzel turah leh pawhsei tura sawi rik awmah pawh Mizoram Sawrkar chu ngaihtuahna zau tak hmang tura an duh thu sawiin, hemi chhunga a nghawng tur ngun taka ngaihtuah chunga ruahmanna fel tak siam a, mi inphal leh tlawmngai pawl te leh mipui nawlpui anga kan zavaia kan tanrual a, kan intanpui a, kan inpuihbawm zel theih dan zawn nise an ti bawk.