PPE Volunteer Group Champhai in hmanrua sem

Champhai-a Personal Protective Equipment (PPE) Volunteer Group chuan COVID-19 laka invenna hmanrua chi hrang hrang mipuite hnenah an semchhuak mek.

Tunlai hrileng darh chak tak Novel Corona-virus Disease, COVID-19 dona kawnga hmalatu hrang hrangte’n he hripui beihletna kawnga invenna thuam, Personal Protective Equipment (PPE) leh a dangte an indaihlohnate hriain an mamawh phuhruk anih theihna turin March 27, 2020 khan PPE Volunteer Group, Champhai hi din a ni a, he pawl din a nih atang hian mi inphalte hnen atanga tanpuina tlingkhawm pawisafai leh thil siamna tur hmanrua atangin COVID-19 dona kawnga tha thawhtu hrang hrangte himna tur hmanrua te a theih ang anga siamin Puanthui thiam mi tlawmngaite mi 42 an inpe bawk a, heng hmanrua thui hna leh a sem hnate a remchan dan ang zela kalpui niin mahni hmanraw intumte tan pawh a thlawnin an siam sak thin bawk a ni.

Tun thlenga khawtual kutchhuak ngei COVID-19 beihletna hmanraw hrang hrang an semchhuah tawh hi Mask 1265, PPE suit 205, Cotton suit 5 leh Cap 16 te a ni a. April ni 3 thleng khan tanpuina sumfai Rs. 31,600/-, Cotton ready made Belt 1, Elastic roll 1 leh Hand Sanitizer litre 2 an dawng tawh bawk a. Nimin pawh khan Damdawi In hrang hrang, District Panchayat Resource Centre (DPRC) Quarantine Centre, Village Level Task Force, Police-te leh mamawhna hmunah te hmanrua te hi an semchhuak leh a ni.