Pawl 12 exam chhunzawm tur Minister in sawifiah

School Education Minister, Lalchhandama Ralte chuan Mizoram Board of School Education (MBSE) in pawl 12 Exam chhunzawm tura thu an chhuah leh ruahmanna an siam chu loh theihloh avanga tih tul a nih thu a sawi.

MBSE in pawl 12 exam lai ten karleh atanga Exam an chhunzawm tur chungchang nimin-a a sawifiahna ah School Education Minister, Lalchhandama Ralte chuan COVID-19 avanga harsatna hian eng chen nge min tihbuai dawn tih hriat a nih loh thu leh zirlai tam takin Subject pakhat chauh exam an la hmabak thu leh hun khirh tak an tawn mek nen zirlai naupangte hian hrehawm tiin zirlai tam tak exam la hmabak te hi an tangkhangin an laklawh tih a sawi a. Ngaihtuahna hrang hrang sen a nih hnuah zirlai naupangte hmakhaw ngaiin MBSE-in Pawl 12 Exam chhunzawm leh tur thu an chhuah leh ruahmanna an siam chu loh theih lohna avangin tih a tul thu thu a sawi a ni.

Education Minister chuan Pawl 12 Exam zawh nan nithum chauh a awm tawh tihah lockdawn hi kalpui a nih thu pawh sawiin, Pawl 12 Exam hmachhawn zirlai naupang 12,609 zinga zirlai 8000 velin exam an zo hman a, zirlai 4700 bawr velin subject pakhat (1) theuh an la hmabak tih a sawi a. April ni 22-a exam turah zirlai naupang 4939 an awm thu te, April ni 23-a exam turah zirlai naupang 1641 an awm thu leh April ni 24 exam turah zirlai 446 an awm thu sawiin, Centre 84-ah Exam hi chhunzawm a nih tur thu a sawi bawk.