MGNREGS hlawh pawnpen phal a nih loh thu sawi

Mizoram sawrkar-a Rural Development Department chuan MGNREGS hnuaia hnathawh hlawhte pawhpen (cut) phal a ni lo tih a sawi.

Nimin a Sawrkar thuchhuah chuan September ni 30, 2019-a RD Department thuchhuah angin MGNREGS hnuaia hnathawh hlawhte pawhpen (cut) phal a ni lo tih tarlangin, sawrkarin a ruahman chhan, Thingtlang Mipuite tan a nihna ang taka hman tangkai a nih theih nan MGNREGS hnuaia Job Card neitute thawh hlawh hi eng thil vang mahin midang tumahin an lak pen (cut) sak tur a ni lo tih mipuite a hriattir nawn leh a ni.

Hei bakah hian tunlai boruak, rampum leh khawvelin hripui COVID-19 a hmachhawn mek lai leh chumi avanga mipuiten eibar zawnna kawnga harsatna an tawh mek lai hian thingtlang mipuiten eibar leh nitin mamawh kawnga harsatna an tawh loh nan mipui (Job Card Holder) te inhlawhna hi tumahin an lakpen/pawhpen (cut) sak tur a ni lo tih pawh tarlangin, hemi chungchangah hian District Programme Coordinator (DPC), District Programme Officer (DPO), Block Development Officer/Programme Officer leh khawtina VC/VEC hruaitute chu mahni bial/Veng theuhah hma la turin hriattir an ni bawk.