Chanchin thar thenkhat :

MZP ten lawmthu an sawi

MZP General Hqrs. chuan MBSE hnuaia pawl 12 exam neih mek COVID-19 Lockdown avanga zirlai tam tak ten an Exam zawh theihloh avanga rilru khingbai taka an awm laia MZP in an ngenna anga Education Minister in Exam an chhunzawm theihna tura ruahmanna a siam chu lawmawm an tih thu an sawi a. Hrileng avanga inkharkhipna kalpui mek anih avangin mahni khawlam a awm, harsatna nei te chuan an awmna hnaia MZP Hqrs./Sub-Hqrs./Branch leh Hnam-pual zirlai pawl hruaitute hriattir turin an ngen a. School/Hostel neitute pawh zirlai Hostel a awm, mahni khua-a haw leh Exam tura lolet te harsatna lo siam sak lo tur leh thlamuang taka exam an hmachhawn theih nana inhawnga lo tanpui turin an ngen bawk.

Hriattirna tichhuak thar
Sawrkar laipui-a Ministry of Home Affairs in Lockdown kalpui meka inkaihhruaina tur a siam zulzuiin Mizoram sawrkar chuan Agriculture kaihhnawih hmanrua, khawl leh bungrua part te chatlak lova lei leh hman a nih theih nan heng bungrua leh part zawrhna dawr leh a siam-thatna hmun te hawn tur a ni tih thuchhuah siamin a tarlang a. Kawngpui dung-a bungrua phur lirthei lian siamna Workshop leh Petrol/Diesel pump te pawh hawn tur a nih thu tarlangin, Thing-puife siamna hmunah te hnathawh chhunzawm a nih tur thu leh a thawktu zawng zawng atanga chhuta 50% hnathawk chawr phal a nih thu a tarlang a. Sangha vulh, zawrh leh a chi semchhuahna kawnga hmalakna te a pangngaia kalpui tur a nih thu pawh a tarlang bawk.

Mamit Officer ten thilpek hlan
Mamit Officers' Club (MOC) chuan ‘MOC FIGHTS COVID-19’ tih thupui-ah hmangin nimin khan Mamit District chhunga ramri hnaih khaw 11-ah thilpek chi hrang hrang- Buhfai, Alu, Dal, Chini, Tel,  Thingpuife, Torch Light, Chi, Theitui, Biscuits, Sahbawn leh Thosi hlo (Killer)-te an hlan.

Dr. John Sailo boral
Meghalaya State-a COVID-19 vei hmuh-chhuah hmasak ber, Dr. John Sailo Ryntathiang (69) chu nimin zing dar 2:30 khan Nongrim Hills, Shillong-a ama din Hospital-ah a boral. Dr. John Sailo hi tunkar Thawhtanni khan COVID-19 a vei tih hmuhchhuah niin amah hi Zunthlum in enkawl lai a ni. Hetihlai hian a chhungte mi 6 chuan CO-VID-19 an kai tih hmuhchhuah a ni leh bawk.

Hruai haw theih dawn rihloh
India hmarchhak-a Mizoram mi leh sa tang-khangmek te Mizoram-a hruai haw tura Mizo-ram sawrkar in ruahmanna a siam mek laiin Ministry of Home Affairs in ruahmanna thar siama May 3, 2020 ralhmaa khualzin phur lir-thei service a khap avangin State leh State ramri a inkalpawh a khap avangin he ruahmanna hi kaltlangpui theih a ni rih dawn lo.

Vawk vulhtu fimkhur turin chah
AH&Vety Department chuan tunhnaiah Assam leh Arunachal Pradesh-ah te Vawk pul hri a leng mek tih sawiin, hei vang hian Mizoram a Vawk vulhtute abn inven lawk theih na nimin khan thuchhuah a siam a. Hmundang/ramdang atangin vawk lakluh loh tur a nih thu te, Vawk note lak thar chu In hran-ah chawlhkar 4 chhung tal dah hrangin natna a neih leh neihloh thlithlai reng tur a nih thu te, Vawk chaw pek tur chu uluk taka chhum hmin vek tur a nih thu tarlangin, Farm chhungah motor leh pawn lam mi luh tir loh tur a nih thu a tarlang bawk.
Heng bakah hian vawk vulhtute chu an Vawk In te nitin damdawi hmanga tifai thin tur te, ram damlo reng reng talh emaw, hralhchhuah emaw loh tur a nih thu te, ran damlo reng reng chu a dahna bik siam-a an damloh chhung chu dah hran tur a nih thu te, Ran damlo chaw pekna hman-rua reng reng a dam lai chaw pek nan hman loh tur a nih thu leh Vawk te chu ran dang nen tlat pawlh theihloh a dah tur a nih thu te an tarlang bawk.

Kolasib DC in Vairengte leh VLTF Duty-na a tlawh
Kolasib DC, Dr. H. Lalthlangliana chuan nimin khan COVID-19 hri laka inven nana Vai-rengte Screening Gate-a hmalakna tlawhin Vairengte Village Level Task Force hruaitute chuan helai hmuna lirthei bungraw phur, phalna nghaka tang-khang engemaw zat innghakkhawm thin chu a him tawk lova an hriat thu an lo thlen a. Kolasib DC chuan ramri a lirthei tangkhang awm lova him taka tlan tlang tir zung zung an nih theih nan Screening point siam belhna turte leh lirthei leh bungraw thenkhat tih thianghlimna (disinfect) hmun tur ruahmanna te pawh duanfel a nih tawh thu a sawi a ni.
Hemi hnu hian Kolasib DC hian Sai-phai, Saipum, N. Hlimen, Thingthelh, Bukpui, N. Chaltlang, Lungmuat, Nisapui leh Serkhan Village Level Task Force duty te tlawhin Chief Minister Relief Fund atangin tanpuina a hlan bakah COVID-19 hri lak a inven nana thil hriattur pawi-mawh te inhrilh nawn leh a ni bawk.

Dy. CM in PHE hotute kawm
PHE Department changtu Deputy Chief Minister, Tawnluia chuan nimin khan a Pisa-ah PHE Department hotute Meeting a neihpui. He hunah hian Deputy Chief Minister chuan Aizawl Tui pump khawl, a bikin Phase-II atan pump thar ngaihtuah tura PHE Secretary chu hrilhin, mimal tui phur leh sem thin te chu mihring tana in tlak a nih leh nihloh enfiah dantur ruahmanna Department in siam turin a ti bawk.
Hei bakah hian Chawngte-ah Tui Pumping system a rang lama ngaihtuah tura hrilhin, Khawhai khaw dai-a Tui hna kanglo awm chu enfiah tur leh khuaa tui lak theih a nih chuan UD&PA atangin a siamdan tur ngaihtuah a nih tur thu a sawi a ni. Khumtung bula pipe khur laih lai tluang taka chhunzawm a nih theih nan Serchhip DC be turin Secretary a hrilh bawk.

Comments

Chhiar Hlawhte