Mizoram tan MGNREGS sum rawn sanction fel

Sawrkar laipui-a Ministry of Rural Development chuan MGNREGA hnuaia Mizoram mipuite inhlawhna atan nimin khan cheng nuai 16818.7 chu a sanction a, he sum hmang hian Mizoram-a Job Card nei mek te tan ni 26 vel inhlawhna siam leh theih tura ngaih a ni.
Hemi chungchanga RD Minister, Lalruatkima thuchhuah chuan Ministry of Rural Development hian nimin khan MGNREGA hnuaia mipui inhlawhna atan cheng nuai 16818.7 hi rawn sanction in he sum sanction-ah hian kum 2020 chhunga January, February leh March thla a mipui inhlawhna sawrkar in ala pek loh cheng nuai 5208 chu tel nghalin, hnathawh tawhna ba hi Job Card Holder-te account-ah nimin vek khan lut nghal tura ngaih a ni a, heti hian kum 2019-2020 chhungin RD Block pakhat tihloh-a Job Card Holder zawng zawngte chuan ni 100 inhlawh vekin kum 2020-21 ah pawh hian ni 100 inhlawhtir theih tumin hma lak mek a ni bawk.
Kum 2019-20 chhunga MGNREGA hnuaia mipui inhlawhna la bat sak hi chawhrualin ni 12.46 vel niin Job Card Holder tin te hian Rs. 2630/- theuh an account-ah lut thei tur a chhut a ni a. Amaherawh chu District thenkhat-ah chuan pawisa lo lut sa a awm nual tawh avangin Job Card Holder zawng zawngte account-ah chuan a lut vek dawn lo thung a. Tun dinhmunah hian Block thenkhatah ni 3 chauh bat sak a nih laiin RD Block thenkhat ah chuan ni 19 lai te la pek loh te a awm a. Hetianga RD Ministry lamin an rawn sanction takah chuan kum 2019-20 chhunga MGNREGS hnuaia mipui inhlawhna zawng zawng chu bat awm lovin pek fel vek a ni ta a. Kum 2019-20 chhung hian nikhat inhlawhna rate chu Rs. 211/- a nih thu a tarlang bawk.
RD Minister chuan kum 2020-21 chhung hian mipui nikhat inhlawhna rate chu Rs. 225/- ah tihsan a nih tak thu pawh tarlangin, tunah hian Mizoram pumah Job Card hi 200,000-a awm mek tih a tarlang a. Nimin a sum sanction cheng nuai 16818.7 atang hian nikum inhlawhna ba cheng nuai 5208 hi pek fel alo nih takah chuan cheng nuai 11610.7 chu la bang thei tura chhut a nih thu leh sum la bang cheng nuai 11610.7 atang hian Job Card holder tinte hian chawhrualin ni 26 vel zel inhlawh thei tur ang a chhut a ni tih an tarlang a. Hetiang a nih chuan Job Card holder tin te hlawh tur cheng nuai 5834 zel chu Ministry hian pawisa min rawn pe sa tihna nih thu a tarlang a. COVID-19 avanga harsatna kan tawh mek sutkianna atan Mizoram Sawrkar chuan theihtawp a chhuah tih tarlangin, “Hemi a tanlakna azara Sawrkar laipui in heti zat pawisa a rawn sanction hi Mizoram sawrkar chuan lawmawm a ti tak meuh a. Mipui in harsatna an tawhlohna turin Project Director leh BDO zawng zawngte pawh in hma la nghal turin ka sawm tak meuh che u a ni,” a ti bawk.

Comments

Chhiar Hlawhte