Central YMA in lawmthu sawina tichhuak

Central YMA chuan Hripui leng avanga harsatna leh buaina kara thinnel leh thuawi taka Mizo mipuite kan awm avanga lawmthu sawiin, kan hmazawn theuh a fimkhur taka hmala chhunzawm zel turin an ngen bawk.

Nimin-a thuchhuah an siamah Central YMA chuan Hripui leng avanga mipuite mamawh atana thawktu Damdawi lama thawktu te, Venhim hna thawktu Police leh Task Force mi te, ei leh in, nitin mamawh phurluttu te, PHE leh P&E Department-a thawk te, Thlai thar buaipuitute leh Petrol Pump leh bawlhhlawh paihtute chungah lawmthu an sawi a. Sub-Hqrs./Group/Branch YMA-te chu Local Level Task Force/Village Level Task Force/District Level Task Force-a an telna theuhah rualkhai zawk leh thahnemngai zawka thawk chhunzawm zel tura ngenin, Mizoram pawn atanga inhlawhfa leh hnamdang hna thawk chhinchhiah an nih theih nana thahnemngai taka hma la tur leh a bik takin thenawm State atanga an lo luh belh loh nan chak taka hmala turin an ti a. State leh International Boundary-a venhimna hna thawktute chu tan la lehzual tura ngenin, nitin mamawh, thlai, buhfai, sa leh a dangte mahni hlawkna chauh ngaihtuaha a man tih san anih loh nana hma la turin YMA te chu an ngen a. Lo, Huan, Leipui-a feh turte remchanna siam sak tura ngenin, tul lova chhuakvak tur erawh chu inkhap tlat nise an ti bawk.