Chanchin thar thenkhat :

Mamit-ah tlaivar-a duty rel

Nimin khan Mamit-ah District Level Task Force on COVID-19 chu thukhawmin Mamit khawpui chhung chu tunlai-a hrileng laka a him theih nan Mamit khaw luhna leh chhuahna-te tun aia nasa zawka venhim nise a ti a. Heng luhna leh chhuahna-ah te hian Sub-Hqrs. YMA hmalakna in tlaivar-a duty thin nise an ti bawk. Hei bakah hian he Meeting hian huan leh lo lama kal turte chu zing dar 9:30 hmaa chhuak vek tur leh feh haw tur pawh tlai dar 5:30 hmaa haw ngei ngei turin hunbi an siam sak bawk.

Police ten chhui zui zel

Mizoram Police te chuan tunhnaia Nizam-uddin, New Delhi-a Mosolman khawmpui, Tablighi Jaamat Markaz atanga COVID-19 darh nasat dan chu chu hriain, Mizoram chhung atanga kal an awm leh awmloh ngun taka an chhui hnuah hriat theih chinah Mizoram atanga kal hi an awmlo ngei nia hriat a nih thu an sawi a, chutih rualin Village Level Task Force te nen tangkawpin COVID-19 kai te Mizoram-a an luh lohna turin theihtawp chuah mek a ni tih an sawi. Hei bakah hian Mizoram Police te chuan thenawm State Assam leh Tripura Police te nen he khawmpui a tel te chhuichhuah hna hi an thawk zel tih pawh an sawi bawk.

Mamit bialtu MLA in tlawh

Mamit bialtu MLA, Er. H. Lalzirliana chuan nimin khan Mamit khawpui chhunga Home hrang hrang 4 leh Village Level Task Force-te duty-na hmun 10-ah a tlawh a, Task Force duty-te chu khawtlang leh ram tan, tlawmngai taka venhimna hna thawk zel tura fuihin, tun ang khawvel buaina hi kan tawn ngai loh thil a ni tih a sawi a, kan hma hun tur zel kan hriat loh avangin Mizo tlawm-ngaihna tak tak nen he hripui hi do tlang turin a sawm bawk. Mamit bialtu MLA hian heng Home hrang hrangah hian Alu Bag, Dal, Artui leh Tel a pek theuh bakah Village Level Task Force duty te hman turin Hand Sanitizer, Glove leh Mask thahnem tak a hlan bawk.

Ruihhlo ngaite puitu tur siam

Social Welfare & Tribal Affairs Department hnuaia Mizoram Social Defence & Rehabilitation Board (MSD&RB) leh Mizoram Drug Users Forum (MDUF) tangdun chuan tunlaia kan hun tawn mekah ruihtheih thil avanga harsatna nei ten tanpuina an mamawh tih an hriatpui thu sawiin, ruihtheih thil thin nghei mekten an paltlang dinhmun hriatthiampuitu, taksa leh rilru lama an harsatna tawh mek sawipui theitu leh mumal taka Counselling neihpui thei tur an mamawh tih hriat-puiin ruahmanna an siam thu an sawi a. Hetianga tanpuitu mamawh tan Phone No. 9862377185, 9862732289, 8729982033, 7085629481, 9862120717, 8974772691, 7005576775 leh 9436140870-ah te biak theih reng a nih thu an sawi bawk.

Dy. Speaker in tlawh

Tuikum bialtu MLA leh Assembly Deputy Speaker, Er. Lalrinawma chuan nimin khan a bial chhunga Darlawng, Tlungvel, Phulmawi, Khumtung, Buhkangkawn, Chhingchhip Mual-pui, Chhingchhip Venghlun, Chhiahtlang, Chhuan-thar Tlangnuam, Baktawng leh Hmawngkawn khuaa Local Task Force duty te a tlawh a. Deputy Speaker chuan Local Task Force duty-te thawh-rimna chu fakawm a tih thu fakawm a tih thu sawiin, “He hripui hi keimahni mai chuan kan do hneh thei lova, kan zavaia kan tanrual hian kan hneh thei a ni,” tiin harsatna kan lo tawk deuh a nih pawhin mipuite chu dawh hram hram turin a chah a, harsatna an neih chuan tanpui a inpeih reng thu a sawi bawk.

Kolasib YMA in CS-ah thlen

Kolasib Sub-Hqrs. YMA chuan Mizoram Chief Secretary hnenah State pawn atanga bung-raw lakluh titawp rih tura ngenna an thlen. Kolasib Sub-Hqrs. YMA chuan State pawn atanga bung-raw lakluh chungchangah COVID-19 lakah Mizoram him zel theih nan State dang nen a zalen taka inkalpawh chu thalo-a an hriat thu an sawi a. State thenawm, Assam-ah he natna vei an pun-chhoh zel avangin Assam atanga mipui mamawh chi hrang hrang lakluh thin chu tun atanga hun engemaw chen chu Buhfai, LPG leh Oil tel lovin lakluh rihloh nise an duh thu an sawi bawk.