Chanchin thar thenkhat :

Buhfai phur chhunzawm dawn

Aizawl Hunthar Veng huamchhung, Company peng-a Local Level Task Force, Police leh Mizoram Truck Owners Association duty-te inkara inhmuh thiamlohna thleng leh hemi chungchanga thuchhuah awm te sawihona chu nimin khan Supply Department-a Commissioner & Secretary, HL. Rochungnunga IAS hovin neih a ni a. Tunlaia Covid-19 hrileng dona kawnga tlawm-ngaia duty te leh sawrkar mi leh sa duty ten theihtawp chhuaha mahni sahimna pawh sawi thei lova hrileng laka mipui an him nan leh ei leh bar an tlakchham loh nana an thawh laia hetiang thil a thleng chu pawi an tih thu sawiho a ni a. Hemi hnu hian MTOA lam pawhin Mizoram mipui tan tha taka an hna chhunzawm an tum thu an sawi a ni.
Ramri-ah venhimna uluk zual
Mizoram thenawm, Assam-ah COVID-19 vei mi 16 lai hmuhchhuah an nih tak avangin Mizoram sawrkar chuan state dangte nena inrina hmunah khauh leh zualin thupek a kengkawh. Mizoram Police-a IGP (Hqrs), John Neihlaia chuan nizan hmasa lam khan thenawm State-te nena inkalpawh theihna hmuna Police duty-te chu khauh leh zuala an hna thawk tura hriattir an nih tawh thu a sawi a. Mipui nitin mamawh phurtu lirthei lolut tur reng reng uluk taka endik a nih laiin, uluk lehzual a endik turin duty-te an hriattir niin a sawi a. A bik takin mipui nitin mamawh leh eichawp lo luhna pui ber Vairengte  leh Rel hmanga buhfai phurhluhna Bairabi lamte, Tripura ramri a Kanhmun lamte chu uluk lehzual tura hriattir an ni tih a sawi a. Bungrua rawn phurluhna Motor ah te pawh State pawn atanga rawn lut ru an awm leh awmloh uluk lehzuala enfiah a nih thu a sawi bawk.
Sawrkar laipui in State te hma la turin hriattir
Sawrkar laipui-a Ministry of Home Affairs-a Secretary, Ajay Kumar Bhalla chuan COVID-19 avanga harsatna thleng mekah thu belhchian dawllo a darh loh nan hma la turin State leh UT-te ziakin a hriattir a, mipui in thudik leh diklo an thliar thiam theih nan Sawrkar Laipui-in web-portal an siam tur thu sawiin, State leh UT te pawh hetiang bawka hma la turin a ngen nghal bawk.
Thu diklo thehdarhtu man
Mizoram Police chuan tunhnaia Delhi khaw-puia Muslim inkhawmpui chungchangah Mizo mi 30 chuang lai an tel ni awmin thu diklo, tul lova mipuite chi-ai thei thehdarh a ni tih an sawi a. Hemi chungchang hi an chhui zui hnuah he thil post hmasa tu nia hriat chu man a nih thu leh Aizawl Police Station-ah thubuai ziahluh a nih thu an sawi bawk.
COVID-19 vei lo tih finfiah
March 29, 2020-a Aizawl Mission Veng a a chenna In-a thi-a hmuh, Madhurjya Bhuryan (36), Senior Audit Officer, AG Office Aizawl chu a thih danah COVID-19 vei nia rinhlehna a awm theih angin a sample te la-a enfiah a nih hnuah he natna hrik hi a pai lo tih finfiah a ni a. Heti hian Mizoram-ah COVID-19 vei hmuh belh an la awm lo a ni.

Comments

Chhiar Hlawhte