Dawt-a Politics inchirh thehna Serchhip ZPM in lawmawm loh an tih thu an sawi

Zoram People’s Movement (ZPM) Party Serchhip Block Committee chuan ramri dep-a Duty te tanpuina tura Serchhip Sub-Hqrs. YMA te bawm dawh, mi tu ten emaw dawt-a politics inchirh thehna atana hmanga Serchhip bialtu MLA an puhna chu lawmawm loh an tih thu an sawi.

Nimin a thuchhuah an siamah Serchhip ZPM Block Committee chuan COVID-19 avanga khawvel a buai thu leh Mizoram pawh kan bang bikloh thu tarlangin, “He hri léng laka Zoram mipuite kan lo him theih nan kawng hrang hrangin sawrkar leh tlawmngai pawl te'n hma an la a; he hri hi ram páwn atanga a rawn luh loh nan, ramri leh hmun hran hranah duty te pawh insiam a ni,” tiin, Sawrkar mi rawihte mai bakah, tlawmngai-a inpe ten nunna thàp hialin venhim hna thawkin an inpekna a ropuiin a zahawm hle tih an tarlang a.

Hetiang hi kan dinhmun mek a nih avangin mi inpe tak takte leh tlawmngai pawl-te chuan tanpuina luanchhuahpuiin, ramri dep leh hmun hlauh-thawnawm (sensitive area)-a Duty-te tanpuina atan hian Serchhip Sub-Hqrs. YMA chuan Serchhip khawchhungah Vehbur khawnin báwm an dawh thu leh an thil tih hi a fakawmin chhuanawm an tih thu an tarlang a. “Chutih laiin tute emaw chuan dâwt-a Politics inchirhtheh nana hmangin, Serchhip Bialtu MLA, Pu Lalduhoma'n a bial chhung a ngaihven loh leh a ngaihthah vanga chhuahin, Social Media lamah thu an vawrh darh a; a lawm-awm loh hle a ni,” tiin, tun ang boruak kan tawh laia mi tlawmngai leh mi thahnemngai te inpekna leh hmalakna heti zawnga chhuah duh an awm chu a thinrimthlak an tih thu leh Vehbur khawntu Serchhip Sub-Hqrs. YMA tan pawh a lawmawm loh hle ang tih a rin theih thu an tarlang.

Serchhip ZPM Block chuan COVID-19 laka Zoram mipuite kan lo him theih nana sawrkar hmalakna te chuan duhthu a sam lo hle tih pawh tarlangin, heti em em-a mimal leh tlawmngai pawl te'n thâ leh sum an sèn a ngai viau mai te chuan kan sawrkar hrawn mek chu a chak tawk lo hle-in, a tih tur a ti zung zung lo zawk a ni tih ti chiangtu zawk a nih thu an sawi a. MLA tan hian tih tur chin leh tih theih chin sawmin, chumi china Serchhip Bialtu MLA-in a tih tur leh tih theihte a tih nasatzia chu a Bial mipuite hian an hrechiang zawk tih an tarlang a, thu rintlak loh leh dâwt thu-a inpuhchhiat chu sim a hun tawh thu leh tun hun hi politics-a inbeihna hun ni lovin tanrual hun a ni zawk tih an tarlang bawk.