DGP in Serchhip-ah NGO hruaitute a kawm

Serchhip District NGO Coordination Committee hruaitute chu nimin khan Mizoram DGP, SBK. Singh chuan kawmin NGO te nen thawhhona tha tak an nei chu lawmawm a tih thu a sawi.
Serchhip tlawha rawn zin Mizoram DGP, SBK. Singh hian nimin chawhma lam khan Serchhip SP Office Chamber-ah Serchhip NGO Coordination Committee hruaitute hi kawmin he hunah hian NGO Coordination Committee Chairman, R. Sanghmingthanga chuan Mizoram DGP in Serchhip a tlawh chu lawmawm a tih thu a sawi a. Serchhip District-a NGO te leh Police te chuan thawhhona tha tak an nei tih a sawi a. DGP pawhin NGO te leh Police ten thawhhona tha tak an nei chu lawmawm a tih thu sawiin, hetianga thawh-hona tha an neih hi chhawmnun zel nise a duh thu a sawi bawk.
He hunah hian NGO Coordination Committee hruaitute chuan Serchhip Bazar building rawk a nih thin thu leh Dan leh thupek kenkawh a that zel theih nan Serchhip Bazar-ah CCTV Camera tam zawk bun tul an tih thu te, Serchhip Bazar-a Police Beat Post chu hmun remchang leh mipui tana pan awlsam zawkah dah nise an duh thu leh Khawhai atanga Chhingchhip panna kawng chu khawchhak lam atanga Dan lova ruihhlo leh bungrua rawn phurhluhna kawng nia a lan avangin helai hmunah hian Check Post siam tul an tih thu te an lo thlen a. Heng an thil thlen te hi a theih anga lo ngaihtuah zui a nih tur thu DGP chuan a sawi bawk.

Comments

Chhiar Hlawhte