Latest News

Oil khuahkhirhna siam

Tunhnaia ramri-a buaina thleng avanga POL Supply khaihlak thei dinhmuna kan din tawh avangin Serchhip District Bawrhsap chuan Serchhip District chhunga Filling Station ten POL pekchhuah dan khuahkhirhna a siam a. Hei hi Supply Department Director in Order alo siam tawh behchhana siam niin he ruahmanna aia tam hian POL hi pekchhuah tur ni lovin Bur-a dawh phal a ni lo bawk. Hei bakah hian Filling Station neitute chuan Petrol hi litre 2500 leh Diesel hi litre 4000 a awmin DCSO hnenah hriattir tur a ni bawk ang.

Tui anga nghet lo belh tlak an ni lo - MNF President

MNF President leh Chief Minister, Zoramthanga chuan, “Tui anga nghet lo Party-te hi belh tlak an ni lo,” a ti.
MNF party in nimin a Aizawl Mizo Hnam Run-a Chhung Inkhawm neih ah MNF President leh Chief Minister ni bawk, Zoramthanga hian thu sawiin Bible-a kan hmuh angin mi nghet lo Pathian in hman tlakah a ngai lo tih sawiin, “A hniam lam lamah tui a luang kual mai mai ang hian an luang kual mai mai a. A remchang ber leh an tana hlawkna a awmna tur lamah an luang kual mai mai a ni,” a ti a. MNF party chu a thuthlung-ah a nghet tih sawiin, 'Pathian leh kan ram tan' tih thuthlung hi a dik a ni, a ti bawk.
MNF President chuan Independent-a thlantlin MLA te chungchang sawiin, “Independent MLA-te hi Anti-Defection Law avangin ZPM zawm ve deuh, zawm lo ve deuhin an awm a. MNF hian thiante namthlak hi kan hreh em a, kan ti lo mai mai a ni. Congress sawrkar kha la nise an MLA tawh lo ang, an disqualify vek ang,” a ti a. Congress Party chuan a tuka dawt a nih lang-chhuak leh mai tur pawhin sawrkar an bei duh nia sawiin, “CAB chungchangah pawh Inner Line Regulation-in a huamte an tel lovang, tih draft-ah telh a ni a. Heti chung hian an hotupa berin, 'An sawi mai mai a ni, ziakin engmah a awm lo' tiin a sawi duh a. Dawt an sawi a ni tih a hnu maia langchhuak leh tur thilah pawh hian min bei char char duh. Kan opposition-te hian min beihna tur hi an tlachham em a, an fawmkhawm nawi thei hle a ni,” a ti bawk.
Nimin a MNF Chhung Inkhawm ah hian an Party zawm thar te lawmluh niin an zinga tel ZPM General Secretary hlui, James C Lalnun-tluanga chuan ZPM chuan Pathian an hlat tial tial tih sawiin, an sawrkar ang tih a hlauhawm tih a sawi a, “Tunah chuan ZPM chu 'Indona field' a ni ta ringawt mai,” a ti bawk.

Comments

Chhiar Hlawhte