Coronavirus laka Serchhip District himna tur sawiho

Tunlaia natna leng mek, Coronavirus laka Serchhip District a him theihna tura hmalak dan tur ngaihtuahin nimin khan District Level Task Force chu District Bawrhsap, Dr. Lalzirmawia Chhangte hovin a Pisa-ah an thukhawm.

Serchhip District Bawrhsap Pisa-a District Level Task Force thutkhawm ah hian District Bawrhsap, Dr. Lalzirmawia Chhangte chuan tunhnaia mi tam takin an thihpui Coronavirus chu Mizoram-ah a rawn thlen hriat la ni lo mah se he hri laka kan him theihna tura inbuatsaihna tul ang ang kalpui a tul thu a sawi a. Serchhip District chuan ramdang nena inrina ramri tawite chauh a nei tih sawiin, amah-erawh chu hemi avang hian inthlahdah theih a nih loh thu leh tih tur tul ang ang te ti thei tura inbuat-saih a tul thu a sawi bawk.

He thutkhawm ah hian Serchhip Chief Medical Officer, Dr. Laldawngliana Sailo chuan sawrkar thuneitu sang atanga he hrileng laka hmalakna tura rawn ruahman hrang hrangte a sawi a, hemi hnu hian hmalak dan tur sawihona nei zuiin ramri hnaih khua-Lungkawlh, Sailulak leh Leng khua ah te he hri leng chungchang mipuite zirtirna hi neih nise an ti a, Serchhip CMO in Medical Officer kal tur leh a Team tur lo ruahmanin he hri leng avanga sum mamawh tur tul hrang hrangte chu CMO leh District Medical Superintendent ten lo ruahman se an ti a. Sawrkar thuneitu sang in ruahman tura an tih angin he hri vei nia rinhlelh te dah lailawk theihna tur Isolation Ward chu Serchhip District Hospital Eye Ward-ah siam nise tiin he hri hi Mizoram-ah a rawn lut palha he Ward hi tihzauh a tul dawn nia a lan chuan Serchhip-a Nursing School sak pawh a tul anga chei theih tura hmalak nise an ti bawk.