YMA Office hawnna nei

Serchhip Sub-Hqrs. YMA chuan kumin atana an Office hawnna leh Pathian hnena inhlanna hun nimin khan an hmang.

Kumin atana Serchhip Sub-Hqrs. YMA Office hawnna leh Pathian hnena inhlanna hun hi Serchhip Sub-Hqrs. YMA Vice President, Lalzuiliana chuan kaihhruaiin RL. Chhuanawma chuan tawngtaina hun a hmang a, hemi hnu hian Serchhip Sub-Hqrs. YMA President, R. Sanghmingthanga chuan Kumthar thuchah sawiin Serchhip Sub-Hqrs. YMA huam-chhunga Group leh Branch YMA hruaitu ni mek leh ni thar te bakah YMA Member te chu kumthar chibai bukin kumthar-ah inpekna sang zawk nena thawk turin a fuih a. Member te leh hruaitute inkarah thawhhona tha a awm theih nana theih-tawp chhuah tura chahin, hruaitute chu hmahruaitu leh hnung dawltu ni chunga member te pen ruala pen thiam turin a chah a. Hei bakah hian ram leh khawtlang veina neih a pawimawh thu sawiin, an hmalakna ah huaisen taka thawk turin a chah bawk.

Hemi hnu hian Serchhip Sub-Hqrs. YMA Secretary, Lalrammawia chuan an hmalakna kal mek leh an hmachhawp te sawiin, hmalakna tur hrang hrangte an sawiho nghal bawk. He hunah hian SEC Member thahnem tak an tel a ni.