Vawiin-ah L&L Football khelh tan a ni dawn

Serchhip District Football Association (SDFA) buatsaih Lalsawmliani & Lal Thanchunga Memorial Football Tournament chu Vawiin hian Serchhip-ah khelh tan a ni dawn ta.

SDFA hnuaia Football Tournament awm zinga lawmman that berna ni thin, L&L Football Tournament hi Serchhip bialtu MLA hlui, Lal Thanhawla te sponsor-na hnuaia khelh thin niin nikum lama khelh tura ruahman chu hun a chep tak avangin kumthar lamah khelh a ni dawn ta zawk a. Tun tumah hian Serchhip District chhunga Club 14 ten tel turin an hming an pelut a, District chhung Zone hrang atang pawhin Club tel tur an awm a ni. Tun tuma tel Club 14 te hi Group 4-ah then niin Group A-ah New Serchhip FC, Vengchung FC leh Hmunzawm FC awmin Group B-ah Bungpui FC Hriangtlang, Hmar Veng FC P&E Veng FC leh Bungtlang Chhim Veng FC te an awm a, Group C-ah AWC FC, Chanmari Veng FC, Leisekawt FC leh Dinthar Veng FC, Thenzawl an awm a, Group D-ah Chhekhnai FC, FC Serchhip Kawnpui leh New Serchhip North FC te an awm bawk a ni. Group pakhat-a awm te hi an inkhelh kual hnuah Group tin atangin pahnih zel in Quarter Final an lut dawn a, Quarter Final atangin Knockout System-a khelh a ni ang.
He Tournament hi Serchhip Sports Complex-ah khelh tura ruahman ni mah se Running Track siam hna thawh mek a nih avangin hman theih a ni ta lo a, hei vang hian DC Playground-ah khelh zawk a ni dawn ta a. He Playground hi hun engemaw chen hman mumal a nih tawhloh avangin cheibawl that ngai a awm nual a, heng te hi nimin khan Serchhip District Bawrhsap, Dr. Lalzirmawia Chhangte hmalakna in JCB hmanga cheithat hna thawh a ni a, hetianga hma lak saktu District Bawrhsap chungah hian an lawm hle tih Serchhip District Football Association chuan an sawi bawk.

Comments

Chhiar Hlawhte