Latest News

Faina-ah hmalakna kalpui

Image
Faina beihpui thlakna atana sawrkar laipuiin programme a duan, Swachhta Hi Seva hnuaiah Faina kawnga hmalakna kalpui mek a ni a, tunkar chhung zawng hian kawng hrang hranga hmalak dan tur duansa hmangin hmalak a ni ang. Nimin khan Serchhip District chhunga khaw hrang hrangah Swachhta Hi Seva hnuaiah hian hmalakna kalpui niin Serchhip-ah chuan khawpui chhunga hmalatu UD&PA Department bultumin khawchhunga vantlang inthiarna hmun tihfai hna thawh a ni a. Thingtlang bika hmalatu PHE Department Serchhip WATSAN Division te hmalaknain Khawlailung, Mualcheng leh East Lungdar-ah te pawh vantlang hmun tihfai hnatlangpui hi neiin hun an hmang bawk a ni.

Serchhip District-ah Chenna In pahnih kang

Nimin khan Serchhip District chhunga khaw pahnih-ah kangmei chhuakin chenna In pahnih a kang a, mihring thi leh hliam an awmlo hlauh thung.
Nimin chawhma dar 10:30 pelh hnu hret khan Serchhip atanga KM 14 vela hla, Keitum khuaa C. Lalbiakkunga te In chu kangin bungrua engmah chuh hman a ni lo a, Keitum Field Veng-a C. Lalbiakkunga te In hi Assam Type niin an chhungkua hi mi 11 an ni a, In neitute hian Keitum atanga North Vanlaiphai panna kawng-ah an chenna In tur sa mekin hetah hian an chhungkua hi kal deuh vekin In nghaktu an fanu chuan In hnuai-ah puan a tah a, hetihlai hian kangmei hi rawn chhuakin kangmei chhuah chhan tak hi hriat a ni lo. Kangmei hi TV dahna lam atanga rawn intan a nih avangin Electric kalsual avanga chhuak nia rin a ni a, a bul vela awm ten kangmei hi thelh nghalin In dang kangkai tur an veng thei a, In kang an thelh lai hian Gas bur puakin hetah hian kangmei thelhtu zinga pakhat chuan hliam na lutuk lo a tuar bawk a ni.
He In kang-ah hian bungrua chi grang hrang bakah pawisafai cheng nuai 1.5 a kang-chhe bawk a, Keitum khawtlang chuan nimin khan In kang bang te senghawi hna thawkin In neitute invawmluhna tur an sak sak nghal bawk.
Nimin vek chawhma dar 10:00 vel khan Sialhau khuaa Lalhnaiha te chenna In-ah kangmei chhuakin kangmei rapthlak zawk a chhuah hmain min tlawmngai ten an thelh thei thung a. Kangmei chhuah lai hian In chhungah tumah awm lovin thenawm hnaia awm ten kangmei a chhuak tih an hriatin an In kalhna tichhiain kangmei hi thelh nghal a ni a, kangmei hi an Mutna pindan lam atanga intan a nih avangin Electric kalsual atanga intan nia rin a ni a, Mutbu leh thawmhnawi chi hrang hrang bakah chhuat leh Bed Room lam Ceiling te a kangchhe hman a, Choka lam kang kai tur chu an veng hman bawk a ni.

Comments

Popular News (Last 30 Days)