Serchhip District-a Electoral Roll Revision neih mek Observer hovin thlirho a ni

Special Summary Revision of Electoral Roll neih meka Serchhip, Lunglei leh Mamit District Observer, Sangdingliana, IAS, Secretary, I&PR chuan nimin khan Serchhip District a Electoral Roll Special Revision kalpui mek a rawn enfiah a. District Election thawktute leh sawm bik mi pawimawh te meeting a neih pui bawk.

Mizoram puma Electoral Roll Special Summary Revision neih meka Serchhip District tana Observer, Sangdingliana hian nimin khan Serchhip District hi rawn tlawhin Serchhip District Election Officer, Dr. Lalzirmawia Chhangte kaihhruaina hnuaiah inkawmna an nei a, he hunah hian Observer chuan Election Commission of India in ruahmanna a siam anga Electoral Roll Revision neih mek enpuia, harsatna awm thei te leh mamawh awm te ngaihthlak sak tura rawn kal a nih thu a sawi a. Electoral Roll hi thawk leh khata a pun thut chuan a rinhlelhawm thei a, chutiang bawkin a pung lo lutuk a nih pawhin a rinhlelhawm thei bawk a, chuvang chuan fimkhur taka engkim kalpui a tula, dik taka hna kan thawh a tul thu a sawi a. Electoral Roll thar chu thla thar February 7-ah tarchhuah a nih dawn thu a sawi bawk.

He hunah hian Serchhip Election Officer, Vanlalhmachhuana chuan Electoral Roll Revision neih meka Serchhip district dinhmun report a pe a, tun Revision neih meka dilna lut tawh atanga chhutin Voter’s pun beisei zat chu 1.89% vel a nih thu a tarlang a ni. Report ngaihthlak zawhah kalkhawm ten sawihona hun hmang zuiin BLO te ngenna thenkhat, Electoral Roll bu-a hming inziak hi a hawrawp a sin thin a, mit chaklo te tan chhungkaw tin Head of Family te hming an zuk hmuh zung zung theih nan Family Serial Number fiah zawka ziah ni se, tih leh an Area atanga Area danga pem emaw, Constituency dang emaw District danga pem-a an awm tharna lam Electoral Roll-a an inthun tawh leh thun loh te awlsam zawka kan zawn chhuaha an BLO te an biak zung zung theih nan Mizoram pum huap Booth Level Officer (BLO) te Directory siam ni se, tih te chu Observer hian CEO lamah a thlen sak tur thu a hrilh a. Hei bakah hian Rationalisation of Polling Station chungchang te, EPIC tih bo print nawn sak chungchang te, EVP chungchang leh thil pawimawh dang te sawi ho a ni bawk.

He hunah tarlan a nih danin Electoral Roll Special Summary Revision neih mekah hian Serchhip District-ah Form 6 hmanga India khua leh tui kum 18 tling tawh, Electoral Roll a hming la chuang lo te tan inziahluh dilna ah mi 1414 (Mipa 697 leh Hmeichhia 717) in dilna an thehlut a, Form 7 hmangin Electoral Roll atanga hming paih dilna lut 314 (Mipa 239 leh Hmeichhia 180) awmin Electoral Roll-a inziaklut tawh te siamthat ngai ten Form 8 hmanga dilna an thehluh ah dilna 646 (Mipa 314 leh Hmeichhia 332) a lut bawk a, Form 8A hmangin Constituency ngai-a Polling Station sawn dilna lut 160 (Mipa 64 leh Hmei-chhia 96) a awm bawk a ni.

Observer hova inkawmna hunah hian District Election Officer, Dr. Lalzirmawia Chhangte bakah Addl. DC, Chuauhnuna te, C. Lalduhzuali ERO leh Election Department-a thawk te bakah Serchhip khawpui chhunga BLO leh Political Party hrang hrang aiawhte an tel a. Hemi hnu hian Election Branch chu Observer hian tlawhin tlai lamah Lunglei District a pan leh nghal a ni.