Health Minister in Cancer Hospital a tlawh

Health Minister, Dr. R. Lalthangliana chuan nimin khan Zemabawk-a Cancer Hospital chu tlawhin Tertiary Care Cancer Centre sak lai mek a hmunah a enfiah a. Cancer Hospital-a thawktu ten lo dawngsawngin hmalakna kal lai mekte ngun leh uluk taka thlirho a ni.

Nimin a Zemabawk Cancer Hospital a tlawhna ah hian Health Minister, Dr. R. Lalthangliana chuan Cancer Speciality Hospital neihna tura JICA, Japan nena cheng vbc. 500 lai hmanga thawhhona an hmuh tur atanga theihtawp chhuah a nih tur thu a sawi a. Cancer Hospital ram pawh amah lo tawiawmtu Local Council leh khawtlang hruaitute hriatpuina in a en zui nghal a. A rang lama ramri tihfel a nih theih nana hmalak dan tur te an sawiho nghal bawk.

Minister hian Central Medical Store (CMS) pawh tlawh nghalin CMS hi a awmna hi hmunhma remchang zawka sawnchhuah emaw, approach road tha zawk siam dan turte sawiho nghal a ni a. Minister chuan Mizoram-in Cancer Hospital changtlung leh tha zawk a neih theihna tura theihtawp chhuaha tan lak mek a nih thu te, sum leh pai lama harsatna awmte pawh sukiang tura sawrkar lam pawhin nasa taka tan a lak thu a sawi bawk. Health Minister hian Cancer Hospital-in a tul anga an hman atan Rs. 10,000/- a hlan a. Hei bakah hian kawlphetha khaihlak avanga Cancer hemna khawlin harsatna a tawh thin sutkian nan an chhungkaw hmingin MAHINDRA POWEROL GENERATOR lian a pe bawk.