Mizoram Governor in MPSC Chairman thar atan Lalramthanga Tochhawng a lalut

Mizoram Public Service Commission (MPSC) Chairman atan nimin khan Lalramthanga Tochhawng, 1986 batch IA&AS (Rtd) chu Mizoram Governor, PS. Sreedharan Pillai chuan rinawmna thu tiam tirin a lalut.

Raj Bhavan Durbar Hall-a MPSC Chairman lakluhna hun hi Chief Secretary, Lalnunmawia Chuaungo chuan kaihruaiin Chief Minister, Zoramthanga leh a thawhpui Deputy Chief Minister, Tawnluia, Cabinet Minister te, Minister of State te, MLA te, Board Vice Chairman te, sawrkar mi pawimawh te leh sawmbik te an tel a ni.

MPSC Chairman thar, Lalramthanga Tochhawng hi Lalthanzama (L) leh Neihthangi (Zote Bakery) te fapa niin June 20, 1960 khan a piang a. Thiamna lamah M.Phil, M.A.(Socialogy) degree nei a ni a. Kum 1986 khan Indian Audits & Accounts Service (IA&AS) ah a inziak tling a. India ram hmun hrang hrang hna thawk kualin Mizoram sawrkar hnuaiah pawh Director & Secretary, Social Welfare Department leh Director, Secretary & Commissioner, Agriculture Department hna te a chelh tawh a. Kum 2007 ah Accountant-General Office Mizorama din anih khan Accountant-General hmasa ber a ni a, kum 2011 ah Principal Accountant General ah kaisangin Principal Accountant General hmasa ber a ni leh bawk.

Kum 2015-a Telengana State siam thar anih khan he State tana Principal Accountant General (Audit) hmasa ber ni turin sawn a ni a, kum 2019 January thla khan Principal Accountant General, Mizoram ni turin a rawn kir leh a. August 1, 2019 khan Mizote zinga pakhatna ni turin Additional Deputy Comptroller and Auditor General, HAG+ Grade, Pay Matrix-a Pay Level 16 ah a kaisang leh bawk a ni.