Latest News

Maxi Cab chesual-ah boral

Nimin chhun dar12:30 vel khan Serchhip leh Aizawl inkara tlan thin Maxi Cab pakhat chu Serchhip Bilzel Veng-ah chesualin Motor khalhtu hi a hmunah a boral.
He Maxi Cab (Rowlands) hi Lalmuanawma, Serchhip Bilzel Veng ami ta niin Zorempuia (20) s/o Thankima, Serchhip IOC Veng-a khawsa mek khalh a ni a, nimin zing khan Aizawl atanga rawn chhuakin Serchhip-ah a rawn tlan a, Serchhip Bazar-a passenger a dah fel hnuah he Motor neitute In ah hian kalin nimin chhun dar 1:00-a Aizawl pana chhuak leh tura Bazar lam pan tura a Motor a inher tur chu kawng-thlang ah a tawlh liam ta a ni.
He motor ah hian a khalhtu chiah hi chuangin a hmun ah a boral nghal a, motor hi kawngthlang ah ft. 120 vel a lum a, motor pawh hi a chhe nasa viau a ni. He Motor khalhtu ruang hi nimin khan Serchhip damdawi In-ah Postmortem niin hemi hnu hian IOC Veng-a a chenna In-ah lak a ni a, hemi hnu hian an khua, Lungpho-ah a ruang hi phurhchhoh nghal a ni.
He vanduaina thlenna hmun hi Vawiin vek khan Serchhip bialtu MLA, Lalduhoma chuan a hmunah a tlawh nghal a, vanduaina thleng chu pawi a tih thu sawiin, nunna chan hial an awm chu pawi a tih thu a sawi a, lirthei neitute leh nunna chan chhungte a tawrhpui thu a sawi bawk.

Comments

Popular News (Last 30 Days)