CM in sawrkar laipui dawr

New Delhi a cham mek Chief Minister, Zoramthanga chuan nimin khan sawrkar laipui a Road Transport and Highways changtu Union Minister, Nitin Gadkari chu a pisa-ah hmu in Mizorama inkalpawhna tihhmasawn chungchang a sawipui a. Food and Agriculture Organization (FAO) Country Director, Tomio Shichiri pawh FAO nena thawhho chungchang a sawipui bawk.
Union Minister, Nitin Gadkari hnenah Chief Minister chuan Mizorama kawng chhia siam thar ngai te leh sum mamawh te sawiin, lei thuam that leh siam that ngai te a sawipui bawk.
Nimin chawhma khan Chief Minister chuan United Nations peng pakhat, Food and Agriculture Organization (FAO) aiawha India rama awm Country Director, Tomio Shichiri leh a thawhpuite a kawm bawk a. Agriculture leh Horticulture lama state sawrkar leh FAO thawhdun theih dan tur sawiho a ni a. Mizoram a Chemical Fertilizer hmang lova thei, thlai leh pangpar tharchhuahte Organic Certification pek chung-chang te, heng thei rah leh thlai tharchhuahte hi an hlutna belhchhah tura sawngbawl chungchang te, hralhchhuahna kawng tha tak siam chung-changte sawi dunin, thalai lehkhathiamte leh entrepreneur ten Horticulture hlawkna an hriat thar a, eizawnna atan mi tam zawkin Horticulture farming an luhchilh chu pawimawh an tih thu an sawi bawk a. Heng zawng zawng atan hian hmanrua a inpuih a pawimawh thu Chief Minister hian a sawi bawk.
FAO leh Mizoram sawrkar tangkawp hian kuthnathawktute tan Farmer Field School (FFS) te buatsaihin, hlawk zawka Serthlum leh Lakhuihthei chin dan leh dahthata sawngbawl dan te inzirtir niin, he hmalakna atan hian FAO atangin cheng nuai 18 hmuh a ni. Tuna state Flagship programme atana FAO nena thawhho theih dan turte pawh sawiho a ni bawk.

Comments

Chhiar Hlawhte