Board thutkhawm neih a ni

SEDP hnuaia din Land Revenue and Survey Board chu nimin khan an Chairman, Land Revenue & Settlement Minister ni bawk, Lalruatkima hovin Secretariat Conference Hall, MINECO-ah thukhawmin Board hmalak dan tur hrang hrang an sawiho.

He sawihona hun hi Chief Minister aiawhin Deputy Chief Minister, Tawn-luia chuan tel puiin Land Revenue and Survey Board chu SEDP hnuaia hmalakna atana inbuatsaihna innghahna tak tak a nih vangin hna pawh a hautak dawn a ni, a ti a. SEDP hnuaiah ram leilung hmang tangkai ngeia intodelh chu an tum bulpui ber a nih avangin Land Revenue and Survey Board mawhphurhna pawh a sangin member te pawhin an rilru leh ngaihtuahna zawng zawng senga theihtawp an chhuah a ngai dawn a ni, a ti.

Board Chairman, Lalruatkima pawhin SEDP hnuaia hnathawh turte hi ram leilung behchhan (land-based) deuh vek a ni a, heng atana ram theh tur ruahman a engkim duan fel chu Land Revenue and Survey Board kovah a tlak avangin an mawhphurhna a sang hle a ni, a ti a, he hna thawk tur hian Department mi leh sa te hman tangkai an ngaih dawn avangin thawktu indaihlohna nasa tak karah theihtawp chhuah a ngai dawn tih pawh sawiin, Sawrkar ram hum-halha a tul anga hman kawngah thuneitu department hrang hrangte leh khawtlang hruaitute bakah mipuite tanrual a ngai hle a ni, a ti a. SEDP atan ram hman theih eng ang nge kan neih tih zirchian a ngaih thu leh Board dangte nen awmze nei deuh a kal tlan a pawimawh dawn thu sawiin, SEDP hnathawh tan hma turin Land Identification tihran a tul hle a ni, a ti bawk.

He thutkhawmah hian Land Revenue and Survey Board kalphung tur leh inrelbawl dan tur te rel a ni a, Expert Committee on Land Reforms Report thlirho a nih bakah Land Survey neih zawh tawh chungchangte sawiho a ni.