MZP hruaitu ten mawh-phurhna an inhlan fel ta

Kum 2019-2021 chhunga MZP General Hqrs. hruaitu thlanna neih a nih hnuah hruaitu kal-chhuak turte chuan nimin khan hruaitu thar te hnenah an mawhphurhna an hlan.
Aizawl-a MZP Conference Hall-a MZP hruaitu mawhphurhna inhlanna hunah hian MZP President kalchhuak tur, L. Ramdinliana Renthlei chuan MZP hruaitu anih chhunga thawhpui tha leh fel tak tak ten an thawhpuinaah lawmthu a sawi a. MZP chu a tul huna Zirlaite leh Ram leh Hnam tana huaisen taka che chhuak thin a nih thu sawiin, MZP hmalakna hrang hrangah dikna nen huaisen taka ke pen zel turin hruaitu thar te chu a chah a ni.
He hunah hian MZP President thar, B. Vanlaltana pawhin Ram leh Zirlaite tan theih- tawp chhuaha ke pen-a hma lak a pawimawh thu sawiin, he Ram leh Hnam tana ngaihtuahna seng chungin MZP Assembly rorelna in a lo pass tawh All India Service/Central Service hrang hrangah Mizo thalai tam zawk kan tlin theih nan a hmalak a nih tur thu leh ILP System chu tun aia mumal zawka kalpui anih theih nan chak zawka bawhzui anih tur thu a sawi a. Ramri chungchang pawh sawiin MZP President thar chuan, “Ramri chungchangah chak zawka hmalak a ngai,” tiin kan Sawrkar hrawn mek chu ramri chungchang ah chak lehzual a hma la turin a ngen a. Ram leh Hnam tana tha turah chuan tih hreh an nei dawn loh thu leh chak leh huai takin an kal dawn tih a sawi a. “MZP Election-a Political Party inrawlh thin hi tha kan tilo a, kan term chhung a inrawlh tum an awm leh anih chuan na takin kan dodal dawn,” a ti bawk.
Hei bakah hian MZP General hqrs. President thar chuan MZP chu Zirlaite leh Ram leh Hnam tana tha turah chuan a inhawng reng dawn tih pawh sawiin, “A tul angin hma kan la zel dawn a ni,” a ti bawk.

Comments

Chhiar Hlawhte