AMFU kum 25 tlin lawmna Dy. CM in a hmanpui

All Mizoram Farmers’ Union (AMFU) chuan nimin khan an kum 25 tlinna, Silver Jubilee an lawm a, Deputy Chief Minister, Tawnluia chuan khuallian niin a hmanpui a ni.

Central YMA Hall, Aizawl-a AMFU Silver Jubilee lawmna ah hian Deputy Chief Minister, Tawnluia chuan ram hma-sawnna bul chu Agriculture-ah a innghat thuk em em tih sawiin, ei leh bar, silh leh fen, sum leh pai-a ram mipuite intodelhna tur khawp chu kan ram leilung-ah a awm thu a sawi a. Mizoram sawrkar hmalakna pui ber, SEDP hmangin Mizoram chu ei leh bar-a intodelh ah siam tum a nih thu sawiin, chumi hlawhtlin theihna turin AMFU te chu an pawimawh hle tih a sawi a. Leilet-a siam theih ramchhunga la awm te cheibawlin hlawk zawka buh tharchhuah te, buh seng hnua Thlasik thlai chin te, thei leh thlai tharchhuah vawnthat leh sawngbawl te, man man zawka hralhchhuah dan kawng zawn te chu sawrkar in a ngaih pawi-mawh ber te zingah a tel thu a sawi a. AMFU te nen tum thuhmun nei, Mizoram intodelh theih nana tan la mek an nih angin thawhhopui ah AMFU Member te chu a sawm bawk.

Nimin a AMFU Silver Jubilee lawmna hun hi AMFU Sr. Vice President, Dr. Chawng-khuma Chawngthu chuan kaihruaiin Mizoram sawrkar-a Agriculture Development Board Vice Chairman, H. Biakzauva MLA pawhin he hun hi a hmanpui a, he hunah hian an pawl President lo ni tawh Vanlalngaia, Chalngura Jahau leh R. Lalduhawma te hnenah chawimawina thuziak an hlan a. Silver Jubilee Souvenir an buatsaih chu khuallian hian a tlangzarh nghal bawk a ni.