Lungkawlh Branch YMA kum 75 tlin lawmna I&PR Minister, Lalruatkima hovin neih a ni

Serchhip Sub-Hqrs. YMA hnuaia awm, Lungkawlh Branch YMA chuan nimin khan an kum 75 tlinna, Platinum Jubilee an lawm a, he hun hi I&PR Minister, Lalruatkima chuan khuallian niin a hmanpui a ni.
Lungkawlh Community Hall-a Lungkawlh YMA Platinum Jubilee lawmna Lungkawlh Branch YMA President, CV. Lalengliana kaihhruaia neih ah hian I&PR Minister chuan Lungkawlh khawtlang mipuite chu Jubilee chibai a buk a. Jubilee chu saltang te tana zalenna nen a inkawp rem thin tih sawiin, Jubilee an lawm lai pawh hian an khawtlangah lo mu lum zo lo, harsatna sal-a tang mek te an lo awm palh theih thu leh an thinlungin mil loh leh inrempui theih loh a neih vanga thinlung lam saltang an lo ni reng thei bawk tih sawiin, chutiang saltanna nei te tanpuina hun remchangah te, midangte rem taka an nunpui thar lehna remchangah te leh a tha zawnga hriatreng tlak thil hlu tihna hun tha ah he Jubilee hi hman tum turin Lungkawlh mipuite a sawm a ni.
I&PR Minister chuan Lungkawlh khawtlang, khaw hlun leh upa tak, kum 150 na lawm mai tura inpuahchah mek chu Rural Development Department chuan nasa takin a vur dawn tih a sawi a. Border Area Development Fund (BADP) sum hmangin |iau lui panna kawng te, huan lo ram panna kawngte, khaw chhunga School Building thar te, Tuikhur te leh thildang ruahmanna engemawzat a awm thu leh an nihlawh thu a sawi a. YMA lo din tan dan leh a lo din chhan te, khawtlang tinin Vawiin thlenga an tangkaipui zia te sawiin, YMA hi nei lo ila he ram dinhmun hi chu a chhe hle-a a rin thu leh, YMA tel lo chuan chhiatni leh thatni-a mahni intuamhlawm zo lo chhungkua tam tak kan awm hialin a rin thu a sawi. Minister chuan, YMA chu roreltu tur ni lovin roreltute tha taka thawhpui chunga ram leh hnam humhalh tur an ni tih sawiin, “Kan ram-a thing leh mau te, tuihna te kan humhalh zel ang a, Pathian min pek kan ram hi nghet taka kan luah zel theih nan inthlahpun deuh deuh kan ngai a, kan chhehvelah ram neilo, Hnam lian tak tak an awm phung a ni tih hrerengin kan ram kan hnam hi duat takin kan enkawl a tul a ni,” a ti bawk.
Lungkawlh Branch YMA Platinum Jubilee lawmna hi nizan hmasa atangin neih a ni a, nimin khan zingkar-ah Jubilee lungphun hawnna te neiin chhun lamah Vantlang Inkhawm an nei leh ta a. Jubilee lawmna puala Souvenir buatsaih chu Lungkawlh khawchhuak AMC Councillor ni tawh leh Lungkawlh lal hnuhnung ber Lalkanglova tunu ni bawk, F. Lalhuthangi'n a tlangzarh a. Hruaitu hluite chawimawina hun an nei bawk a. Nizan khan Jubilee lawmna hi neih chhunzawm in zawhfel a ni.
Lungkawlh khua hi N. Vanlaiphai chhak, Hrangturzo tlang chhim lama awm a ni a, tun ah hian In 160 vel awmin mihring 850 vel an cheng mek a, YMA member hi 536 an awm mek a ni.

Comments

Chhiar Hlawhte