Health Minister in Central YMA hruaitute kawm

Health & Family Welfare Minister, Dr. R. Lalthangliana chuan nimin khan Central YMA hruaitute kawmin Mizoram-a HIV darh zel dolet dan tur chungchang a sawipui.
He hunah hian Health Minister Dr. R. Lalthangliana chuan kumin chho a HIV dinhmun tarlanna thar ber ah Mizoram dinhmun a sang filawr ta chu a veiawm hle tih sawiin, tunhnaia doctor pawl te, Kohhran hruaitute leh tun tumah Central YMA hruaitute lengah sawma he thil hi engtia ralpui do a do chi nge tia sawiho tha a tih avangin inkawmhona chu rawtchhuah a nih thu a sawi a. Central YMA chu Mizoram-a pawl lian ber leh huamzau ber anih angin Mizote tan YMA awm chu malsawmna leh Pathian remruatna ropui tak a ni, a ti a. HIV dona kawngah te chak taka, awmze nei taka an thawhho ngei a beisei tih a sawi bakah Kohhran hruaitute he thil a ngenna chuan rah tha a chhuah thu a sawi a, Presbytery-ah HIV in sawi a hlawh chu lawmawm a tih thu leh, hetianga kan veitlana kan tanrual chuan HIV dona kawngah hma kan sawn ngei a beiseiawm tih a sawi bawk.
He hunah hian Central YMA President, Vanlalruata pawhin thu sawiin YMA chu he thilah hian a tlanchhe dawn lova, a phak tawkin HIV dona kawngah theihtawp a chhuah dawn a, amaherawh chu kan ram milin enge tha ber ang tih chu kan ngaihtuah leh sawiho tlan tul a tih thu a sawi bawk.
He sawihona ah hian ngaihtuah tura chhawpchhuah engemaw zat MSACS lamin an nei a. Chungte zingah chuan YMA chanchinbu ah te, thlan laih nikhua leh khawhar lenpui hunah te HIV/AIDS chungchang zirtirna sawi zau te; Central YMA bultuma Aizawl khawpui huamchhunga YMA Branch te kokhawma HIV Sensitization programme buatsaih te; HIV darh zel venna atan ‘Harm Reduction’ kawng awm te kalpui theih a ni em tih ngaituah te; HIV hrik pai ART damdawi ei chhunzawm ta lo YMA tanpuina a chhui te; SRS tih chak dan te leh HIV dinhmun hre tura thisen endikna zau taka kalpui dan te a tel an ni.

Comments

Chhiar Hlawhte