Dy. Chief Minister in tlawh

Nimin zing khan Deputy Chief Minister leh bialtu MLA ni bawk, Tawnluia chuan Khaw-zawl District tih changtlun nana sawrkar Department hrang hrang awmna tur hmunhma an endik a, he hunah hian Sub-District Hospital leh CMO Office tlawhin, Khawzawl Kawnzar a Sports Complex sakna tur, District Treasury Office, Mualzawm Field-a phullem phah dan tur te en in, DC Office Complex leh SP Office tur hmunhma te a en bawk a.

He hunah hian Deputy Chief Minister hi Rural Development Department, UD&PA Department, Accounts & Treasuries Department, Information and Public Relations Department, Health and Family Welfare Department, Land Revenue & Settlement Department leh Public Works Department a hotute leh khawtlang hruaitu ten an tawiawm a ni.

Deputy Chief Minister hian nimin vek khan Khawzawl Dinthar Bazar zawl-a MLA Local Area Development Scheme hnuaia Puanthui khawl leh rangva semna hun chu a hmanpui nghal bawk a, bial chhunga tanpuina mamawh te tan MLA Fund chu tangkai taka hman a nih tur thu sawiin, a mamawhtu dik tak te hnen a thlen theih nan khawtlang hruaitute leh pawl hrang hrangte nena thawhhona tha a awm a ngaih thu a sawi bawk.