Mizoram sawrkar in Indian Forest Act, 1927 siam\hat tur a nihna anga pawm theih niin a hre lo

Sawrkar laipui in Indian Forest Act, 1927 siam\hat (Amend) a tum chungchanga inrawnkhawmna chu nimin khan neih a ni a. He inrawnkhawmna a tel te hian Mizoram mipuite hmakhua ngaihtuahin Draft Indian Forest (Amendment) Act, 2019 chu a nihna ang anga pawm theih niin an hre lo.

Sawrkar laipui chuan Indian Forest Act, 1927 chu siam danglam tumin Indian Forest (Amendment) Act, 2019 ruahman chhinna (draft) a peihfel tawh a. He Draft hi India rama State hrang hrangah March ni 14 khan sawrkar laipui chuan a thawn darh a. State sawrkar te ngaih dan a rawn bakah State Sawrkar chu he Dan in a nghawng tur mipui mimir ngaihdan la a, inrawnkhawmna ko turin a hriattir a. Chumi bawhzui chuan Mizoram sawrkar chuan website-ah a thehdarh nghal a, hemi hnu nimin khan inrawnkawmna (Consulatative meeting) hi neih a ni zui ta a ni.

Mizoram hian Indian Forest Act, 1927 hi hmang lovin Mizoram mipui mimir khawsak dan leh nunphung nena inmil dan hranpa, Mizoram Forest Act, 1955 a nei a. Indian Forest (Amendment) Act, 2019 hi Sawrkar Laipuiin a pass chuan Mizoram Forest Act, 1955 hi hman chhunzawm theih a ni dawn tawh lo a. Nimin a inrawnkhawmna a tel te hian Draft Indian Forest (Amendment) Act, 2019 hi zirchiangin he dan thar hian India Danpui (Constitution) Article 371 G-a Mizoram humhalh bikna provision, a bik taka Mizo Customary Law kan neih mek te, ram lei leh hralh chungchanga thuneihna a neih mek te nasa takin a  khawih (encroach) dawn a hriat a ni a. Mizoram in dan a hman mek heng - The Lushai Hills District (Village Councils) Act, 1953 te; The Mizoram (Prevention & Control of Fire) Rules, 2001 te; The Mizoram Forest Act, 1955 leh The Mizo-ram (Land Revenue) Act, 2013 te chu a vai emaw, a \hen lai emaw tihtawp a nih dawn mai bakah India Danpui (Constitution) Sixth Schedule hnuaia Autonomous District Council area ho in a Constitution hnuaia anmahni tan a dan siam theihna thuneihna a pek te pawh a la bo dawn a. Heng chhan hrang hrangte avang hian Meeting chuan Mizoram mipuite hmakhua ngaihtuahin Draft Indian Forest (Amendment) Act, 2019 chu a nihna ang anga pawm theih niin a hre lo va, sawrkar laipuiah thlen ni se an ti a ni.