Mizoram Team te chawimawina hun hman a ni

Sports & Youth Services Department chuan Asia khawmualpui-a Youth Football Tournament lian ber, Subroto Cup International Football Tournament, 2019-a Under-14 Boys category-a Champion, Mizoram Team te chawimawina hun nimin khan Aizawl Press Club-ah an buatsaih a. He hun hi Sports Minister, Robert Romawia Royte chuan hmanpuiin Mizoram Team chu SYS Department enkawl Regional Sports Training Centre Football Academy, Saidan Kolasib-a training an nih avangin sawrkar hmalakna tihlawhtlingtu chhuanawm tak an nih thu a sawi bawk.

Subroto Cup Football Tournament, 2019 hi August ni 21 - 29, 2019 khan New Delhi ah khelh a ni a, Mizoram aiawhtu Saidan Secondary School, Kolasib hian an khingpui te hneh vekin Final-ah nikuma Subroto Cup Football Tournament Semi Final-a an hnehloh, champion nilai Unique Model Academy of Manipur chu sihnih faia hnehin an champion a, lawmman ah Rs. 3,00,000/- an dawn bakah Mizoram player Romalsawma chu Best Player ah thlan niin Mizoram Team Coach Lalbulliana chu Best Coach ah an thlan bakah Best School lawmman hlan an ni bawk.