ZPM Party thar hruaitu tur ruat niin President thar atan Lalliansawta ruat a ni

Zoram People’s Movement (ZPM) Party hun khaihlak hun (interim period)-a an hruaitu tur an inruat thar ta.
ZPM hruaitu tharte hi Val Upa Council (VUC) Secretary Dr.Thangchungnunga chuan nimin-a ZPM Chhung Inkhawm Aizawl-a neih ah puangin President atan Lalliansawta, ZPM Steering Committee Chairman nilai bakah Vice President atan mi pathum, Dr. Kenneth Chawngliana, Lalthansanga (Chate-a) leh Rev. Darchungnunga te an ni a. Treasurer atan C. Lal\anpuia ruat a ni bawk. July ni 23, 2019-a ZPM Executive Committee \hukhawmin a lo rel tawh angin, ZPM chu Political Party anga ‘registered’ a lo nih tak avangin Dan anga hruaitute thlan theih a nih hma, kum khat emaw atan Interim Office Bearers thlang tura ZPM Val Upa Council (VUC) ruat an nih anga hruaitu tharte hi thlanchhuah an ni.
ZPM President thar, Lalliansawta chuan, “Ka hun tawng ropui tak a ni a. Bible chang, ‘Chungnungbera thiltihtheihna in a uap ang che’ tih chu ka rilru a lo lang hmasa ber a ni,” tiin Zoram mipuite chu kum 2023 inthlanpuia ZPM sawrkar kalphung thar a thlen ngei theih nana thawhpui ah a sawm a. Vice President ruat thar mi pathum, Dr. Kenneth Chawngliana, Lalthansanga (Chate-a) leh Rev. Darchungnunga te bakah Treasurer C. Lal\anpuia ten thu an sawi bawk.
He hunah hian C. Lalsawivunga MLA pawhin thu sawiin, Brig. T.Sailo chu zui tlakah an ngai tih a sawi a, “A policy hi kan ramin a mamawh nia kan hriat avangin kan zui a, mahse ti hi kan ni ta si a. Chumi kara ZPM a lo piang nawlh mai hi Pathian hnathawh a ni ang tih hi ka pawm dan a ni,” a ti a. Kum 2023 inthlanpuiah hi chuan Zoram mipuiin ZPM hi an thlir ber a ni, a ti bawk. C.Lalsawivunga chuan kan ram hian hruaitu lu ber mi rintlak, mi rinawm a mamawh a ni tih pawh sawiin, “Kum 33 zet State kan nih chhung hian kan ram inrelbawl dan kan hria a. Chumi in a rawn hrinchhuah chu hruaitu \ha kan ram hian a mamawh a ni tih hi a ni,” a ti a. “Tun kan dinhmunah hi chuan lungawina tur a awm lo a, an ngaihtuahna in a tlin tawk hna an thawk a. Kan ramah party ruihchilhna paih ila, hruaitu \ha thlang chhuak thei turin mipuite’n ngaihtuahna sen a hun tawh tak zet a ni,” a ti bawk.

Comments

Popular posts from this blog

PAN CARD an tih teh fo hi - Laldinpuia