Serchhip-ah Journalists ten TB natna an zirho

* Kumin ah TB vei 58 hmuhchhuah an ni tawh

Nimin khan Serchhip-ah thuthar thehdarhtute tan TB natna enkawl dan, Revised National TB Control Programme (RNTCP) chungchangah Workshop neih a ni a. Kumin chhungin Serchhip District-ah TB vei mi 58 hmuhchhuah an nih tawh thu leh mi 2 enkawl dam an nih tawh thu tarlan a ni.

Serchhip District TB Centre buatsaiha Serchhip CMO Conference Hall-a he Workshop-ah hian Serchhip District TB Officer, Dr. Lalhlunpuii chuan kum 2025-ah TB natna umbo tuma theihtawp an chhuah mek thu sawiin, anmahni in theihtawp chhuaha hma an lak mek thu a sawi a. Kum 1962-ah National TB Control Programme (NTCP) kalpui \an niin TB natna vei te chu damdawi te chawhin anmahni In lama in enkawl tura tih an lo nih \hin thu a sawi a. Amaherawh chu kum 1992-ah he Programme hi enfiah leh a nih hnuah kum 1993-ah Revised National TB Control Programme (RNTCP) chu kalpui leh a nih thu sawiin, a tirah State 5-a mipui nuai 24 tuamin hei hi tihphun zel niin kum 2006 March thla ah chuan India rampum tuam a nih thu a sawi bawk.
Dr. Lalhlunpuii chuan TB natna chu mihring in an vei chuan kar 6-8 chhunga a lanchhuah thu sawiin, enkawl loh chuan mi pakhat in kum khat chhungin mi 10-11 hnenah a kaidarh theih thu a sawi a, TB hrik chu boruak-ah lengin mi tam takin hip lut mah se taksa a natna hrik dotu chaklo ten an vei \hin thu leh khawvel puma TB natna vei hmun 4-a \hena hmun khat chu India mi an nih thu a sawi a, kumtin mi nuai 27 ten an vei thar anga chhut a nih thu a sawi bawk. TB natna hi HIV hrik pai ten an vei awlsam thu pawh sawiin, hei vang hian TB hrik pai te thisen chu enfiah zel a nih thu leh HIV leh TB hrik pai kawp te chuan ART an lak \hat chuan TB hi \ha taka enkawl theih a nih thu a sawi a. Hei vang hian HIV vei hmuhchhuah te pawhin TB natna an vei leh veihloh enfiah ngun se \ha an tih thu leh ART Centre erawh Serchhip-ah ala awm loh thu a sawi bawk.
Serchhip District TB Officer chuan TB vei enfiahna hi Serchhip District chhunga PHC, CHC leh Serchhip District TB Centre-ah a awm thu sawiin, heng hmun-ah hian Khak enfiahna a\angin TB vei leh vei loh enfiah theih a nih thu sawiin, TB vei nia inrinhlelhna nei- Rihna tlahniam, Kar 2 aia rei khuh leh khawsik leh thildang a rinhlelh te chuan heng hmun te hi pan \hin se an duh thu a sawi a. TB hrik enfiahna khawl CBNAAT chu Mizoram District hrang hrangah an neih tawh thu leh Serchhip District-ah pawh kumin hian neih an beisei thu a sawi bawk.
TB natna vei te tan hian thla ruk (6) chhung damdawi ei tur niin sawrkar chuan a thlawna damdawi a pek bakah eitur \ha an ei theih nan thla tin Rs. 500/- a pek bakah \ha taka damdawi ei zo leh enkawl dam te chu Rs. 750/- pek an nih \hin thu a sawi a. TB vei ten thla ruk chhunga damdawi an ei turah thla hnih an ei chinah chuan midang-a thehdarh a hlauhawm loh deuh tih pawh sawiin, hei vang hian damdawi ei \hat a pawi-mawh thu a sawi a. TB damdawi ei \ha duhlo te tan TB natna dam har chi, MDR-TB chu vei mai a hlauhawm thu pawh a sawi bawk.
He huna tarlan a nih danin kumin kumtir a\angin Serchhip District-ah TB vei mi 58 hmuh-chhuah ni tawhin nikum-a hmuhchhuah 49 aiin an tam tawh zawk a, heng TB vei thar zinga 21 te hi Khak-a TB vei niin midang 19 te chu Khak nilo hmundang-a hmuh a nih thu leh a dang 18 te chu Chuap-a tui tling a\anga hmuhchhuah an ni a, kumin ah TB vei 28 te chu tihdam ni tawhin heng zingah hian nikum lama TB vei te leh lo enkawl tawh te pawh an tel a. HIV leh TB hrik vei kawp mi 4 awmin TB vanga thi mi 3 an awm tawh a, damdawi ei mek mi 56 an awm bawk. Kumin hian Serchhip District-ah TB natna dam har chi, MDR-TB vei hmuhchhuah an la awmlo tih he hunah hian tarlan a ni bawk.

Comments

Popular posts from this blog

PAN CARD an tih teh fo hi - Laldinpuia