Sawrkar in kawngpui \ha a ngai pawimawh, kawng siam nan pawisa dap zel a ni ang - Dr. Thangtea

Health Minister, Dr. R. Lalthangliana chuan nimin khan cheng nuai 6,767 seng a sial Thanlawn-Singhat (Ngopa-Tuivai) road a hawng a. Mizoram sawrkar in kawngpui \ha neih a ngaih pawimawh thu leh kawngpui \ha siam nan sum pawh a theih ang anga dap a nih tur thu a sawi bawk.

Health Minister, Dr. R. Lalthangliana hian Ngopa kawtchhuahah Ribbon chep chat-a kawngpui hi hawngin a chhinchhiahna lungphun a hawng nghal a. Hemi hnu hian kawng thar hawn inkhawm Ngopa Jubilee Hall-a neih chu hmanpui zuiin sawrkar in kawngpui \ha a ngaih pawimawh thu leh Chief Minister pawhin a ngaih pawimawh ber pakhat anih avangin kawngpui \ha siam turin pawisa hmuh theih ang ang an dap zel dawn tih a sawi a. Thanlawn-Singhat (Ngopa-Tuivai) road chu India hmarchhak leh South East Asia ramte inkalpawhna \angkai tak a ni dawn tih sawiin, Saitual-Saichal inkar kawng pawh District Hqrs. thar kalpawhna kawng hnai leh remchang ber anih avangin kawng hlun \ha deuh a siam a pawimawh thu leh Black-top anih thuai theih nan ngaihtuahna sen a \ul thu a sawi a. Sawrkar angin ke an pen \an mek tih pawh sawiin, thil thar zir tur tam tak a awm thu leh hun hmasa lama tihsual leh tihfuhloh an neih te pawh an pawm thlap thu leh tihsual nawn an tum tawh loh thu a sawi a. Mipuite chu sawrkar hmalakna dikna leh rinawmna nena thlawp tura sawmin, SEDP pawh a taka kalpui thuai turin chak taka hma lak mek a nih thu a sawi bawk.

Thanlawn-Singhat (Ngopa-Tuivai) Road hi KM 41.50-a thui niin NEC 11th Plan Scheme, Ministry of DoNER a\anga thawh a ni a, Intermediate Lane National Highway Standard Road niin kawngpui zau zawng hi metre 7.50 niin black-top chin hi metre 5.50 a zau a ni a. Culvert 174 awmin Retaining Wall siam zawng zawng hi meter 1679.55 a tui a ni a, Kutcha Side Drain KM 36.158-a thui leh Pucca Side Drain KM 5.049-a thui siam a ni bawk.

Kawng laih hna hi June, 2011 khan contractor 28 hnenah Work Order pe a thawh \an a ni a, \ul ang ang te hi nikum June 2 khan thawh zawh niin he kawng hi sawrkar laipui in National Highway-a a puan thar, Keifang-Saichal-N.E. Bualpui-Tuivai Road’ NH-102 ‘B’ ami a nih avangin a hawnna neih hnu hian Chief Engineer, PWD, Highway kutah hlan a ni ang.

Nimin a he kawngpui hawnna hun hi HL. Rochungnunga, Commissioner & Secretary, PWD in kaihruaiin Human Resource Development Board Vice-Chairman, L. Thangmawia chu khual zahawm a ni bawk.