Latest News

Mizoram-a District thar pathum siam tur atan Deputy Commissioner tur ruat an ni ta


Mizoram sawrkar chuan Mizoram-a District thar pathum (3) siam tura hma a lakna kal zelah heng District thar pathum-a Deputy Commissioner (DC) tur te a ruat ta a. Hetihlai hian heng District thar turte ramri erawh tihfel ala nilo nia thudawn a ni.

Mizoram District thar pathum atana Deputy Commissioner thar ruatna hi nimin khan Department of Personnel & Administrative Reforms (DPAR)-in tichhuakin heng DC thar turte hi an hna zawm nghal tura tih an ni a, an vaiin MCS Officer vek an ni. Sawrkar thuchhuah tarlan danin Hnahthial DC atan SIRD&PR Director ni lai Vanlalmawia chu ruat niin, Khawzawl DC atan Joint Chief Electoral Officer nilai, H. Lianzela leh Saitual DC atan Transport Department-a Additional Secretary post chelh mek, C. Lalpeksanga te dah an ni. Hetihlai hian, Mizoram sawrkar chuan Disaster Management & Rehabilitation Department Director nilai, FJ. Liantluanga chu Joint CEO atan a dah thar nghal bawk.
Hemi hmalam hian Chief Minister, Zoramthanga chuan Saitual, Hnahthial leh Khawzawl District te chu an DC hoin kumin August ni 15-a Independence Day lawmtir an tum tih a lo sawi tawh a. District thar ramri-a rinluh duhlo chu an duh duhna ah tel an remti ang tih pawh sawiin, Aizawl District mipui nuai thum chuang awmnaa Office dawr hautak lutuk kara awm reng ai chuan thil tih zung zung awlsamna District te zawka awm chu chak an la tam tulh tulh dawn niin a sawi bawk.
Kumin June ni 13-a Assembly Budget Session-ah khan Chief Minister, Zoramthanga hian kum 2008-a MNF sawrkarin tihpuitlin a lo tum tawh District thar pathum, Khawzawl, Sai-tual leh Hnahthial District te chu a rang thei ang bera hawn a, hnathawk thei tura siam thuai chu a kaihhruai sawrkarin a tum thu a sawi a. DC pisa pathum dinna atan cheng nuai 450 dah hran a rawt thu a sawi a, hei hi District pathum tan cheng nuai 150 \heuh a nih thu te, SP Office din nan cheng nuai 65 \heuh, a vaiin cheng nuai 195 ruahman a nih thu a sawi bakah SEDP hnuaiah District thar pathum ding tir inrelbawl nan cheng nuai 855 ruahman tel a nih thu a sawi bawk a ni.

Comments

Popular News (Last 30 Days)