SRS te ruihhlo man MKHC Chairman in halralin ram leh hnam tana an thawhna ah lawmthu a sawi

Central YMA hnuaia ruihhlo dotu pawl, Supply Reduction Service (SRS) Batch 8-na in ruihhlo an man khawm cheng nuai 473 man vel chu Inrinni zing khan Aizawl Tuikhuahtlang-a Central YMA Office tual-ah Mizoram Kohhran Hruaitute Committee (MKHC) Chairman, Rev. R. Lalhminthanga'n a hal ral.

SRS ruihhlo man sa halralna puala inkhawm tawi buatsaihah MKHC Chairman leh Synod Moderator ni bawk, Rev. R. Lalhmingthanga chuan, tunhma deuh kha chuan YMA chu thlan laih leh \anpui ngaite \anpui \hintu nia hriat an ni \hin tih sawiin, tunah erawh tun hmaa la hriat ngai loh sualna chi hrang hrang do a an hman hlelh a ngai ta chuan ngaihtuah a ti thui hle a ni tih a sawi a. Hetihrual hian khawtlang nun siam\hat kawnga YMA hmalakna chu thil ropui tak a ni tih sawiin, “Ram leh hnam tana in thawhna ah MKHC Chairman leh Synod Moderator ka nih angin lawmthu ka sawi a ni,” a ti. Rev. R. Lalhmingthanga chuan, Mizoram-ah ruihhlo chi hrang hrang a hluar chho nasa zel tih sawiin, ruihhlo do hna chu YMA in thawk lo ta se Mizoram dinhmun chu a ngaihtuahawm dawn hle nia a ngaih thu a sawi a. An hmalakna vangin ruihhlo tam tham tak man a ni \hin chu lawmawm a tih thu sawiin, Mizo \halai tam tak nunna suattu ruihhlo do hna chu thawk zel tur leh tun aia nasa zawka \an la zel turin Central YMA hruaitute chu a chah a ni.

He hunah hian Central YMA President, Vanlalruata pawhin thu sawiin ruihhlo do leh sualna chi hrang hrang vengtu tur ni lo YMA in tun thlenga he hna thawh a la ngai chu pawi a tih thu a sawi a, ruihhlo an do vang hian YMA chuan sawiselna tam tak a lo tawh phah tawh \hin tih sawiin, hetiang ang hi ni mahse tha an thlah a nih vaih chuan Mizoram dinhmun tur chu a chhiat nasat dawn bawk si vangin tlawmngaih an la chhuah hram hram tih a sawi a. Tunhnai ah ruihhlo tih leh ruihhlo vanga thihna a hluar leh tawh tih sawiin, hetihlai hian naupang an pian tlem telh telh vangin ngaihtuahna hman uluk a \ul thu a sawi a, ram leh hnam siam\hat kawngah sawrkar, Kohhran leh YMA chu rualkhai taka an thawhho a ngai tih a sawi rualin, “Hetiang ni lo a, a dotu chu ban pakhat chauh a nih reng chuan a tliah hun a awm palh ang tih hlauhthawn awm,” a ti.

He huna tarlan a nih danin, SRS Batch 8-na ten nikum December ni 20 a\anga kumin March ni 31 thlenga ruihhlo an man hi cheng nuai 473 man vel hu niin ruihhlo man zingah hian Heroin, Ganja, Methamphetamine leh ruihhlo atana hman damdawi dang leh dan lova kawl Zu te a ni a, ruihhlo kaihhnawih ah hian mi 959 an man a, chung zinga 82 chu Home-ah dah niin, mi 18 chu Excise hnenah hlan an nih bakah mi 16 te chu Police hnenah hlan niin, mi 458 te chu Counselling pek an ni.