Lirthei intlanchhawk a \hat loh chuan tihtawp nghal tum

Home Minister, Lalchamliana chuan thla thar a\anga Aizawl khawpui chhunga lirthei intlan-chhawk tura tih chu a \hat loh chuan tihtawp leh nghal tur a nih thu a sawi.
Nimin-a Aizawl Mizo Hnam Run-a MNF Chhung Inkhawm ah thu sawiin Home Minister, Lalchamliana chuan thla thar June a\anga Aizawl khawpui-a lirthei intlan-chhawk tura ruahman chu enchhinna mai a nih thu sawiin, “Kan Chief Minister zahawm tak, Pu Zoramthanga hian Traffic Jam hi a vei takzet a, chumi atan chuan kawng hrang hrang hmalakna lian tham a kalpui mek a. Traffic Management Committee pawhin Traffic Jam hi a ziaawm phah beiseiin intlanchhawk dan thar hi kan enchhin dawn a ni. A \ha a nih chuan kan hmang zui ang a, a \halo a nih erawh chuan tihtawp leh nghal tur a ni,” a ti bawk.
Home Minister chuan MNF Ministry-a Minister of State-te chu Independent Charge pek vek an nih avangin Cabinet Minister-te nen an danglamna a awm lo tih sawiin, “An department chan \heuhah thuneihna tawp an neih bakah Council of Ministers \hutkhawmah pawh an tel vek a. Kan hotupa ber hnuaiah tu pawhin kan ngaihdan tlang takin kan sawi ngam \hin hi a lawmawm hle a, kan CM inngaihtlawmna hi a chhuanawm hle a ni,” a ti bawk.
Zoramthanga kaihhruai sawrkar chuan sawrkar tuk a\angin chak takin kawng hrang hrangin hma a la nghal char char tih pawh sawiin Home Minister chuan, “Kan Election Manifesto pawh kan tihlawhtling nual tawh a, a lawmawm hle a ni. Eirukna do tur Lokayukta pawh sawrkar in ngaih pawimawh hmasak ah a nei a, din chhoh mek a ni hi a lawmawm hle a. Zu zawrh tihtawp mek a ni te, sum awm ang ang pawtkhawma nasa taka kawngchhia siam\hat mek a nite hi a lawmawm hle a. Manifesto \henkhat la tihhlawhtlin lohte pawh hi a tahtawla tihhlawhtlin chhoh zel a ni dawn,” a ti bawk.

Comments

Popular posts from this blog

PAN CARD an tih teh fo hi - Laldinpuia