Serchhip District-a Election duty tur ten training nei leh

Lok Sabha inthlanpui neih turah inthlanni-a mipui te vote thlak buaipuitu turte tana training thawh hnihna chu nimin khan Serchhip-ah neih \an niin Vawiin-ah chhunzawm a ni ang.
Lok Sabha inthlanpui neih tura Serchhip District chhunga Polling Officials te tana training thawh hnihna hi Govt. Higher Secondary School, Serchhip-ah neih niin Presiding Officer leh Asst. Presiding Officer te tan nimin khan training neih a ni a, Vawiin ah Polling Officer te tan chhunzawm leh a ni ang.
Nimin a PRO leh APRO te tana training-ah hian Master Trainer mi 5- Pinky Zo-sangpuii, SDO (C), Thenzawl; C. Lalduhzuali, Settlement Officer, Serchhip; Dorothy Muan-sangi, SDO (C), N. Vanlaiphai; Ngurthansanga, SDC, Serchhip leh Lalhruaitluanga, DLAO, Serchhip ten zirtirna an pe a. Inthlanpui neih tura PRO leh APRO te hriat tur pawimawh hrang hrang leh mipui ten tluang taka Vote an thlak theih dan tur te, Vote thlakna khawl enkawl dan leh Strong Room thlenga Vote thlakna khawl him taka an ken dan turte an zirtir a ni.
Serchhip District chhungah hian Lok Sabha inthlan buaipuitu (Polling Personnel) atan mi 420 ruatchhuah an ni a, heng mite hian thla hmasa khan Training thawh khatna an neih hnuah nimin a\ang khan a thawh hnihna hi an nei leh a, karleh Thawh\anni khian training hnuhnung ber neih tura ruahman lawk a ni. Serchhip District-ah hian Polling Station 77 a awm a, chung zinga 8 chu hmeichhe hlang duty-na tur ‘Dingdi’ Polling Station tur a ni.
Nimin a he training neih a nih rual hian inthlanna a duty turte tan hian Vote thlakna tur, Election Duty Certificate (EDC) chu pekchhuah nghal a ni a, he EDC hmang hian Election-a duty turte hian an duty tibuai lovin an remchanna hmun apiangah Vote an thlak nghal thei dawn a. Hemi hmalam hian Police duty turte chuan EDC hi an lo lachhuak tawh bawk a ni.

Comments

Popular posts from this blog

PAN CARD an tih teh fo hi - Laldinpuia