Inthlanpui atan campaign theih hun a tawp ta; Serchhip-ah inthlanna bungrua pekchhuah \an a ni

Mizoram Lok Sabha inthlanpui neih tur atan campaign theih hun chu nimin tlai dar 5:00 khan a tawp ta a. Naktuk Ningani zing dar 7:00 a\angin mipui ten Vote an thlak dawn a. He inthlanpui nei tur hian Serchhip District pawh inpeih thawhkhat tawhin nimin khan inthlanna bungrua te pekchhuah \an a ni bawk.

Lok Sabha 17-na dinna tura inthlanpui thawh khatnaa Vote thlak turte tana inthlan campaign theih hun hi nimin tlai dar 5:00 khan tawpin Mizoram-ah pawh campaign theih hun hi khar a ni ta a, hetianga campaign theih hun khar a nih hnu hi chuan Star Campaigner te, Political Party hruaitute, Candidate te leh anmahni aiawhtute tumahin Press Conference leh Interview neih phal a ni tawh lo a, Vantlang aurinna hmanga inthlan campaign thu leh hla voters te rilru hneh thei thil puan pawh khap niin Musical concert, vantlang inkhawm, kawngzawh leh voter te hip thei thildang engmah huaihawt phal a ni lo a, Television leh Radio-ah te sawihona (panel discussion) leh inthlan thlirlawkna ang chi party leh candidate tu emaw hlawkpui theih tur thil tihchhuah khap a ni bawk.
Hei bakah hian India Danpui (Constitution) hnuaia Article 324-na in thuneihna a pek angin Election Commission of India chuan State leh District Level Media Certification and Monitoring Committee-in a hma a phalna (pre-certification) a lo pek tawh sa anih loh chuan  Vote thlak ni leh Vote thlak hma ni ah chanchinbu-ah Political Advertisement tihchhuah phal anih loh thu a sawi bawk a, he thuchhuah hi State leh District Level MCMC bakah Political Party te, Inthlan chuhtu Candidate te leh Chanchinbu enkawltu zawng zawngte zawm turin thupek a chhuah nghal bawk a ni. He thupek in a huam chin chu Mizoram-ah chuan April ni 10 leh ni 11, 2019 a ni ang.
Mizoram Lok Sabha inthlanpui neih turah hian Candidate mi 6 awmin Vote nei thei mi 7,84,405 an awm a, heng te hi mipa 3,81,991 leh hmeichhia 4,02,408 niin heng a tello mi 6 an awm bawk a, heng mite Vote thlakna atan hian Polling Station 1,175 ruahman niin heng bakah hian Tripura Relief Camp-a awm te Vote thlakna turin Special Polling Station 15 siam a ni bawk.
Hetihlai hian he inthlanpui neih tur atan hian Serchhip District pawh a inpeih thawkhat ta a, nimin khan Serchhip District chhung Polling Station 77-a Duty tur Polling Party te kalna tur chu tihfel niin hemi rual hian heng Polling Party ten inthlanna a an hman tur bungrua chi hrang hrangte chu pekchhuah nghal a ni a, an bungraw lakchhuah te hi nimin vek khan Polling Party te hian enfiah nghalin an hawn nghal a. Vawiin ah Polling Party te hi kohkhawm leh nghal niin Vote thlakna khawl, EVM leh VVPAT te pekchhuah leh an ni dawn a, heng Vote thlakna khawl te an lak hnu hian an Duty-na tur Polling Station \heuh an pan nghal dawn a ni.
Lok Sabha inthlanpui neih tura Serchhip District chhunga Polling Party 77 te kalna tur hian Bus 7 leh LMV 66 ruahman a ni a, heng te hi 26-Serchhip (ST) AC-a Polling Station 23 tan Bus 1, Taxi leh Car 30 leh Maxi Cab 3; 27-Tuikum (ST) AC-a Polling Station 29 tan Bus 2, Taxi leh Car 10 leh Maxi Cab 14 bakah 28-Hrangturzo (ST) AC-a Polling Station 25 tan Bus 4 leh Maxi Cab 10 te a ni a, 27-Tuikum (ST) AC leh 28-Hrangturzo (ST) AC-a duty turte chuan tukin dar 9:00 a\angin an duty-na tur an pan \an anga, 26-Serchhip (ST) AC-a duty turte chuan zing dar 11:00 a\angin an duty-na tur an pan \an dawn a. Tun \umah hian khaw awmdan in a zirloh deuh avangin 27-Tuikum (ST) AC huamchhung khawchhak lama duty turte chuan kalna lamah harsatna an tawk deuh nia thudawn a ni a, hei vang hian kawng hla lamah kalin Kawlkulh kaltlangin Polling Party \henkhat te chuan an duty-na tur hi an pan dawn a ni.

Comments

Popular posts from this blog

PAN CARD an tih teh fo hi - Laldinpuia