Damdawi In hmun ngaihtuah uluk a tul
- Zonuna Kawlni
Tunhnaia Serchhip NGO Coordination Committee \hukhawm chuan Serchhip District Hospital sak tur chungchang ngaihtuahin tuna kan damdawi In awmna hmunah hian a rang thei ang berin sak nise an duh tih an sawi a. Hmun buai emaw, rokhawlhna awm thei laka fihlim tur hmun ah hian damdawi In hi sak mai an duh thu an sawi bawk a. He an thutlukna hi VC hrang hrang, Political party hrang hrang leh mitin in lungrual taka pawm tlan ni thei se an ti bawk a ni.
Tunhma lam deuh a\ang tawh khan kan damdawi In hian chanchin alo nei tam tawh khawp mai a, tuna kan damdawi In awmna hi vantlang kawng kaltlang a nih avang leh Bazar nena inhnaih tak leh bengchheng tamna tak, damdawi In thli te pawh mipuite tana la hnawk mai thei a nih avang hian Serchhip mipui tam ber te hi chuan sawnchhuah mai hi kan duh niin a lang a. Tuna an awmna hmun ah hian TRAUMA Centre ala awm dawn tho avangin chhuahsan vek lovin Casualty changtlung tak ala awm dawn tho avangin sawnchhuah hi kan hnial lo tlang ni te pawhin a ngaih theih awm e.
Hetiang taka kan damdawi In sawnchhuah kan duh tlang nia a lan avang hian Serchhip Chanmari Veng, Lawibual ram an tih chu en a ni a, khawtlang hruaitute leh department lam te pawh hian damdawi In awmna atan hian a remchang pawh an ti tlang viau niin a lang a, hei mai bakah hian a bul maiah hian Nursing School tur ram pawh pek a lo ni tawh nghe nghe a nih kha. Hei vang hian ram neitute nen inremsiamna te neiin Health Department te pawhin a hmunhma te cheiin an in ti neitu viau a, ram neitu zinga \henkhat te pawh Health Department-ah hnathawka lutin tun thlengin an la thawk a ni.
Amaherawh chu hun alo kal hret a, ram neitute zinga \henkhat te chuan an beisei ang hna an hmuh takloh avangin an ram pek an remtihna chu an hnukdawk zui ta a, chutihlaiin damdawi In tur hmun atan lo kawh tawh ah chuan Nursing School tur sak a ni ta hlauh mai bawk nen, hei hian kan damdawi In sakna tur hmun chungchang ah hian harsatna min siam sak ta ni berin a lang a. Hemi hnu hi chuan sawrkar lam a\angin damdawi In sawnchhuah ai chuan a hmun ngaia sak belh hi sawimawi a ni zui ta deuh ngar ngar niin a lang bawk.
Hetiang a nih avang hian kan tlawmngai pawl lam te hian damdawi In hmun tur hi dap zelin damdawi In hmun tura an lo kawh tawh bul chiah chu biakfel leh a ni a, nikum lam khan kan District Bawrhsap hova enfiah niin a ram neitute pawhin an ram hi pek an remtih thu te sawiin, sawrkar hna te pawh beisei an neihloh thu an sawi a, hei hi thuneitute hnenah pawh thlen a ni a, Serchhip mipuite pawhin damdawi In thar sak hna hi bul \an thuai a ni tawh turah kan lo ngai tawh a ni.
Amaherawh ch Serchhip mipui ten damdawi In sak hna \an mai tura kan ngaih tawh lai hian building sa tura hmalakna erawh hmuh tur a awm chuanglo nge, sawrkar lama kan hotute lam a\angin harsatna sawi thawm erawh hriat tur a awm ta zawk fo mai a, a bik takin Aizawl lama hotu lian te \awngkam ni awm tak ti ti lengvak-ah kan damdawi In hi sawnchhuak lovin tuna a awmna hmunah hian a sang zawnga sak belh rawtna te awm zui ta bawk a. Amaherawh chu kan damdawi In awmna hmun hi hmun laili leh vantlang kawngpui kaltlangna, damlo te pawhin zan lamah harsatna an lo tawrh phah fona hmun a nih avangin Serchhip mipuite hi chuan a hmun ngaia sak leh ngawt hi chu kan tuipui fahran lo niin a lang.
Tin, kan damdawi In sawnchhuahna atan hian tuna an sawi fo, Lawibual ram hi mipuite pawh kan lungrual viau niin a lang a, Media hrang hrang thlirin sawiselna thawm hmuh tur pawh a awm lemlo a ni. Chutihlai chuan a panna kawng a len tawkloh thu erawh damdawi In sawnchhuah duhlote a\ang hian hriat tur a awm fo \hin thung a, hei mai bakah hian heng mite a\ang bawk hian tunhma lama Serchhip boruak chhia leh \hangthar te chuan kan kalsan mek, ‘Sawlam leh helam’ boruak chu sawi thar a awm leh zeuh zeuh bawk a, ‘Hetiang boruak chhia hmang hian \hangthar te hi min chotuahtu an awm em ni?’ tih pawh ngaihtuahna ah a lut ta zawk mah mah a ni.
Kan sawi fo \hin angin Serchhip damdawi In hi Mizoram laili a awm a ni a, mihring pung chho zelah Mizoram hmun hrang hrang a\angin pantu pawh an tamin an la awm belh zel dawn ni te pawhin a lang a, kan sawrkar lam hotute duhsakna avangin khawl leh hmanraw \ha zawk leh changkang zawka thuam zelin a thar te pawh bun belh zel a ni a, thawktute pawh an pung ve zel bawk nen, tuna kan damdawi In awmna, ram zauh belh ngaihna awm tawhlo hi chu kan duhkhawploh hun hi hun reilote ah a awm leh ngeiin a rinawm.
Chuvangin damdawi In hmun zau zawk hi kan la mamawh belh zel dawn a, khawpui laili taka damdawi In lian tak awm hian damlo te tan ngei ngei pawh harsatna a thlen \hin zia chu a hretu vek tho kan nih avangin tunah hian ngaihtuahna uluk taka kan sen a pawimawh hle mai a. A chhawrtu leh a hmang \angkaitu turte leh damdawi In chungchanga harsatna a awm pawha a tuar hmasa tur chu Serchhip mipuite bawk hi kan nih avangin damdawi In chungchang ah hian ngaihtuahna uluk takin seng ila, sawrkar lama kan hotu lian mi \henkhat te ngaihdan ngawt aiin khawtlang mipuite ngaihdan hi kan ngaihchan thiam a pawimawh zawk hle awm e.
Comments
Post a Comment