Cable TV Fee lak dan thar leh MCU

Cable TV Fee lak dan thar leh MCU

- J Sawma 

Tunlai chu Mizoram Consumer Union (MCU) te zarah Cable TV fee lak dan thar, February  2019 a\anga hman \an tak hi kan hre lar ta hle. Fee lak dan thar duangtu, Telecom Regulatory Authority of India (TRAI) chuan tuna kalphung thar hi Subscriber-te hmakhaw ngaia duan, 'subscriber-ten an channel en duh chauh an thlan theihna tur a ni' an ti a, a tak ramah erawh thil awmdan a danglam viau niin a lang thung.
1. TRAI thupek ang hian Cable TV Operator ten Network Capacity Fee (NCF) Rs.130 an khawn tur a ni a, hei hian Free to Air Channel 100 aia tlem lo a keng tel tur a ni thung (Free to air channel 100 hi Basic Service Tier, BST tia sawi a ni bawk). NCF/BST Rs.130 hi GST 18% nena belh chuan Rs. 153 vel a lo ni ta a, hei hi Cable TV pawt hrim hrim chuan an chawi a ngai phawt. 
2. BST/NCF Rs. 150/- hian Free to Air channel chiah a keng a, Mizote ngainat leh en duh ber pakhat, Local channel-te erawh a keng tel lo. Mizoram-a kan Cable TV Operator lian bik 2-ah sawi ta ila, BST hian LPS-1 leh Local Channel tesep dang emaw, Zonet Zawlbuk leh Local Channel tesep dang te emaw a keng tel lo tihna a ni.
3. TRAI thupek hnuaiah hian Cable TV operator-ten an subscriber-te en duh zawng milin packages an siam thei a, hei hi Operator te tana awlsamna tur leh subscriber tam tak, Technical thil tam tak chhut thiam phaklo te tana awlsamna tur a ni pakhat. Chung Package te erawh chu barh luih a rem lo a, a duhtute tan a ni ber e.
4. Subscriber te hian channel mal tin an thlang thei. Mahse BST/NCF kan sawi tak erawh khi chu an lak tel ngei ngei a ngai thung. A tawi zawnga sawi chuan Rs. 150/- kha an chawi ngei ngei phawt ang a, abak chu an duh zawng Pay Channel kha MRP+18%GST in an lei belh mai dawn tihna a ni. BST ah hian Local Channel a tel loh avangin Local channel en duh tan chuan subscribe belh emaw, Local Channel an dahna package lak emaw a ngai tihna a ni.
5. Tuna TRAI thupek thar hi tuin nge hlawkpui ber ta ang? Pakhatna-ah chuan sawrkarin chhiah a hmu \ha lehzual dawn a, 18% chhiah kha kim takin a hmu tawh dawn a ni. Chhiah hi mipuite pek a ni. Entirnan tuemaw-in channel Rs. 400/- man lo thlangkhawm ta se la, 400 a\anga 18% chu Rs.72 daih a lo ni ta a, a chawi tur chu Rs. 472/- a lo ni ang. A hlawk ber pahnihna chu channel pe chhuaktu Broadcaster te an ni ve leh a, MRP a\anga 80% an chanpualah dah a ni.
6. Multi System Operator (MSO) te, (Mizorama MSO lian pahnih chu LPS leh ZONET) Distribution Platform Operator (DPO) an tih, (HITS provider leh DTH operator viz TATA Sky, Airtel etc) te a dawtah an awm. Anni hian advertisement te an la huikhawm thei deuh a, an ziaawm hret. Mahse Pay channel-ah Broadcaster ten 80% an la nghal si a, a la bang 20% pawh chu an chanpual bik a la ni ta lo leh nghal. An hnuaia Local Cable Operator (LCO) te nen an la sem leh a ngaih avangin anni ho hi an dinhmun a \ha chuang lo hle. Local channel an tih chhuah a\anga advertisement an hmuhte erawh an la chang thei hram.
7. Dinhmun chhe ber chu Local Cable Operator LCO an tihte hi an ni. Entirnan Mizoram-ah chuan LPS leh ZONET te hi MSO lian zual an ni a, anni hian khawpui chhungah pawh direct-a an enkawl chu subscriber tlem zawk an ni. A tam ber chu an hnuaia awm LCO te kaltlanga TV signal pek an ni. LCO te hian advertisement a\anga sum hmuh an nei ve lo a, NCF a\anga share an neih ve beitham tak leh Pay channel a\anga an share tlemte chauh an chang ta a ni.
8. He kalphung tharin hrinchhuah ber chu Cable TV enman sang zawk, en tur tlem zawk si a ni ber a, langtlang veka chhiah lak a nih tak avangin sawrkar a hlawk ber a, a tuartu ber chu Consumer te kan ni ta ber zawk awm e. 
TRAI lamah pawh complaint thehluh nise, tuna kalphung thar kan hman hma-a, man tlawm zawk sia channel tam zawk kan en thei kha subscriber/Consumer te tan chuan a \ha ber si.

Comments

Popular posts from this blog

PAN CARD an tih teh fo hi - Laldinpuia