A vawi hnihna atan Serchhip-ah ‘Thlai Thar Kut’ hlawhtling taka hman a ni

Serchhip-a Divisional Horticulture Office leh Agriculture & Horticulture Cooperative Society Ltd. Serchhip \angkawp buatsaih ‘Thlai Thar Kut-2019’ chu nimin khan Serchhip-ah neih a ni a, Zawlpui phai-a Thlai tharchhuah chi hrang hrangte chu man tlawm zawka hralhchhuah a ni.

Nikum lama buatsaih a nih hnuah a \um hnihna atan nimin khan Serchhip Bazar-ah Divisional Horticulture Office leh Agriculture & Horticulture Cooperative Society Ltd. buatsaihin ‘Thlai Thar Kut-2019’ neih a ni a. He ‘Thlai Thar Kut-2019’ hi Horticulture Department Secretary, Rodney L. Ralte chuan khuallian nia hawngin Thlai tharchhuahna lama Serchhip hlawhtlinna chu hre tawh \hin mah se a taka ala hmuh ngailoh hmuhna hun remchang a nei chu lawmawm a tih thu a sawi a. Serchhip-a Kuthnathawktute chu Aizawl Bazar chawmtu an nih thu sawiin, Serchhip a\anga thlai thleng a awm loh chuan thlai te a to in a vang \hin tih a sawi a, chutiang tura kuthnathawktute inpekna chu lawmawm a tih thu leh hlawhtling tur chuan atchilh a \ul \hin thu sawiin, Serchhip Zawlpui phai-a thlai chingtute chu duhsakna dawng tlak an nih thu a sawi a. Tun aia tam zawk leh hlawk zawka thar tura \anlak zel erawh a \ul thu sawiin, India sawrkar in ‘Kum 2022-ah chuan loneitu ten an sum hmuh let an thawkchhuak ang’ tia beihpui a thlakna chu an kalpui mek thu leh chumi atan chuan \anrual a \ul thu a sawi bawk.
He hunah hian Khuallian, Horticulture Department Secretary hian Zawlpui phai-a thlai chingtu zing ami, Lalzemawia, Serchhip Dinthar Veng hnenah ‘Horticulture Secretary Award’ a hlan a, Lalzemawia hian a hlawhtlinna avangin nikum lamah Mizoram sawrkar a\angin ‘Young Achiever Award’ dawngin kumin hian Zikhlum 1,00,000 chuang zet an chin bakah Bawkbawn kung 8000 chuang an phun a, heng bakah hian Zikhlum karah An\am chingin an hralh zo tawh a, Tomato erawh \hahnem tak phun mah se Krismas dawna sik leh sa danglam thut-ah a thi zo a, an thlai tharchhuah a\ang hian In an sak tawh bakah 207 Truck leh Car bakah lirthei ke hnih nei chi te an lei tawh bawk a ni.
Serchhip DHO, Margaret Vanlalzami kaihhruai he hunah hian Horticulture Department Dorector, Dr. Elizabeth Saipari pawhin hetianga Serchhip-a ‘Thlai Thar Kut-2019’ hman a ni thei chu lawmawm a tih thu sawiin, DHO leh a thawhpui \hahnemngai tak leh ngaih-sak tlaka hna thawktu kuthnathawktute avanga he hun hi hman theih a nih thu a sawi a. Horticulture chu sumdawnna a nih thu leh hlawk thama hna pawh kan thawh a \ul thu sawiin, chutianga \hahnem ngai te avang chuan ‘Vegetables Bowl of Mizoram’ tih a nih thu a sawi a. Serchhip Sai-liamkawn-ah thlai dah\hatna hmun, ‘Cold Chain’ siam tura hmalak mek a nih thu leh a thar hun pangngai ni lova thlai thar chu a hlawk zawk avangin chutiang kawngah chuan hma an lak mek thu a sawi bawk.
He hunah hian Agriculture & Horticulture Cooperative Society Ltd. Chairman, PC. Siamliana pawhin thu sawiin sawrkar in an tana hma a lakna hrang hrangah lawmthu a sawi a. Ser-chhip Zawlpui-a thlai chingtu ten Tur an hman loh thu pawh sawiin, Tur leh thildang hmanga an puhna awm \hin chu sumdawnna kawnga anmahni beihna leh an itsikna a nih thu a sawi a, an eitur a hran ching anga an puh \hin pawh thu diklo a nih thu sawiin, zawrh tura an lak zing ami chu a remchan anga an ei ve mai \hin zawk thu a sawi bawk.
Serchhip-a Thlai Thar Kut hman-ah hian Serchhip Bazar-ah Dawr \hahnem tak hawn a ni a, heng Dawr hrang hrangah hian Agriculture & Horticulture Cooperative Society Ltd. member te thlai tharchhuah chi hrang hrangte chu a man tlawm zawka zawrhchhuah a ni a, he hun hi mipui ten an hlutin khual a\ang pawhin mi \hahnem takin an lei a ni.

Comments

Popular posts from this blog

PAN CARD an tih teh fo hi - Laldinpuia