Mizoram sawrkar in Dry Day a puan chu Gauhati High Court in a tihtawp sak

Mizoram Sawrkarin MLPC Act hnuaia Zu zawrh kalpui mek titawpa hun rei tak chhung Zu hralhchhuah phal lohna Ni, ‘Dry Day’ a puang chu Gauhati High Court Aizawl Bench-a khin a nih hnuah nimin khan Court chuan ngaihtuahin Dry Day kalpui mek chu a titawp.

Mizoram sawrkarin an Zu chhekkhawl sa te hralhchhuah phal loa ‘Dry Day’ a puan khum vanga lungawi lovin sawrkar phalnaa Sap Zu chhekkhawltute leh a zuarchhawngtute chuan Gauhati High Court Aizawl Bench-ah sawrkar thupek hi an khing a. An thubuai hi nimin khan Gauhati High Court Judge, Justice Michael Zothankhuma’n ngaihtuahin, Mizoram Excise & Narcotics Deptartment Commissioner-in tun thla ni 14-a thupek siama March ni 15, 2018 thleng Dry Day a puang chu \an chhan bulbal nei lo nia sawiin, a hnawlsak a. Sawrkar chu phalna neia Zu chhekkhawltute chu an phalna neihin a huam chinah Zu lakluh leh hralhchhuah phalsak turin a hriattir nghal bawk.
Zu chhekkhawlna (Bonded Warehouse)-ah hian kumin January ni 18 thleng khan Cheng Vbc. 15 dawn lai man Zu a tangkhang niin a neitute chuan an sawi a. Hetianga sawrkarin Dry Say puan hnana tihtawpsak a tum ta mai hian sum leh pai nasa takin a hlohtir dawn niin an sawi a ni. 
High Court chuan sawrkarin Dry Day a puan chhan ber chu Zu khap burna Dan kalpui an tum vang nia a lan thu sawiin, inthlan dawna an Manifesto tihhlawhtlin an tumna kawnga phalna neia Zu zuarte tuarna tur a ngaihtuah tel lo chu thil dik a ni lo, a ti a. Zu khapna Dan siam a nih hmaa hman an tum nghal mai chu Dan dinglai kalh a ni, a ti bawk.
Hetianga Dry Day an puan chhan ber hi Republic Day leh Chapchar Kut vuakveta boruak \ha a awm theihna tur nia sawrkarin a sawi chu Republic Day hman zawh fel a ni tawh a, Chapchar Kut lah a hun a la hlat deuh avangin High Court chuan thu awmze neilo ah a ngaih sak a. Council of Minister chuan eng thu pawh rel se Governor-in a pawmpui phawt loh chuan state sawrkarin a bawhzui nghal tur a ni kher lo a, state sawrkar pawh he MLPC Act., 2014 hian a phuar ve tho a; he Dan hi a la ding reng a ni, tiin High Court thutlukna chuan a tarlang a ni.

Comments

Popular posts from this blog

PAN CARD an tih teh fo hi - Laldinpuia