Reiek-a Zofest vawi 8-na hman mekah nimin khan Cultural Day hman a ni

Reiek khuaa Zofest vawi 8-na hman mek chu nimin khan chhunzawm niin, Zokhua Reiek hmunah Cultural Day hman a ni a. He hun hi Cross Remliana, Councellor, Rangamati Hills District Council Bangladesh chuan khuallian niin a hmanpui a ni.

Zofest vawi 8-na hman meka nimin a Cultural Day hman hi Andrew F. Lalramnghaka, Finance Secretary, MZP chuan kaihhruaiin khuallian nia he hun hmanpuitu Cross Remliana chuan Mizoram chhung a\ang ngeia Zofate insuihkhawn theih nana nasa taka hetiang a Zofest buatsaih a ni hi lawmawm a tih thu a sawi a. “Vawiin ah Zofate hi ram hrang hrangah khawsa in cheng darh mai ila, hnam khata siam chawp, phuahchawp kan ni lova. Pathianin duhtaka a siam chhulkhat kual kan ni a, engemaw chhuanlam hmanga then hran theih kan ni lo hrim hrim a ni,” a ti a. Ram pathum- India, Myanmar leh Bangladesh a cheng Zofate chu hun lo kal zel turah Pathian in rorelna pakhat hnuaiah a la chhungkhawm ngei a rin thu sawiin, “Zofate kan khawsakna hmunah \heuh hnam nunphung, chin dan leh sakhuana i vawnghim zel ang u,” tiin he huna Palai kalte chu a chah bawk.

He hunah hian James Lalchhuanawma, President Mizo Cultural Organisation (MCO) General Headquarters chuan MZP ten chhim leh hmar chhak thlang a\anga unau chhulkhat kual intawhkhawmna hun an buatsaih thei chu fakawm a tih thu sawiin, Mizo te hi Pathian in hnamah min siam a, tlang hrang hrang leh hmun hran hranah awm mah ila unau kan nihna leh chhulkhatkual kan nihna kan hnam kal phung hi vawngnung zel ila. Kan hnam hian hma asawn a hnam ropui kan nih theihna turin MZP hmalakna chu MCO an thlawp zel dawn thu a sawi bawk.

He hunah hian MUP President, RK. Thanga chuan Zofate hi kan duh vang renga \hendarh kan nilo tih sawiin, Khawvel hmun hrang hrangah Zofate hi kan cheng tih a sawi a. Pathian in hun \ha min pe anga, engtik ni ah emaw chuan rorelna pakhat hnuaiah kan la awm ang tih hi MUP chuan a ring tlat tih a sawi a. “Chutiang a thlen theihna tur chuan Zohnahthlak hnam peng hrang hrang te hi inla hrang lo ila. Unau kan nihna hi pawm tlang ila. Zohnahthlak hnam \awng hrang hrang erawh indipdal sak lo ila. Chu chuan hnam ropui takah min hlang kai dawn a ni,” a ti bawk.

Zofest-a Cultural programme-ah hian Mizo hnam lam chi hrang hrang leh zaithiam hrang hrang te zai ngaithlaa hun hman a ni a. He Zofest hmang tur hian Myanmar, Bangladesh leh India state hrang hrang hrang a\angin Palai an kal \ha hle a, mi \hahnem takin Aizawl leh a chhehvel a\angin lehlangin an chhim bawk a ni.