Latest News

Tripura Relief Camp-a awm te vote thlakna tur ruahman mek Mizoram CEO in a tlawh

Mizoram Chief Electoral Officer (CEO), Ashish Kundra chuan nimin khan Mamit District chhungaKanhmun khua a Temporary Polling Station 15 hmun turte leh Temporary Polling Station sak mek te a enfiah a. Tripura-a Bru Camp-ah hian tun dinhmun ah Vote nei mi 11,968 an awm mek nia chhinchhiah a ni.

Tripura Camp-a awm Mizoram Electoral Roll-a hming chuang ten Mizoram MLA inthlanpui a vote an thlak theihna tura Kanhmun khua a Temporary Polling Station 15 sak lai mek te leh Security te awmna tura ruahman hi nimin khan Mizoram CEO hian tlawhin hemi hnu hian Kanhmun Tourist Lodge-ah Mamit DC, North Tripura DM, North Tripura SP leh Kanhmun khawtlang hruaitute, Zirlai pawl aiawh leh Kohhran hruaitute nen inkawm hona an nei nghal a. He hunah hian CEO chuan Kanhmun khawtlang hruaitute chu MLA inthlan tluang taka a kal theih nan thawhpuiah a sawm a, National issue anih vangin Kanhmun NGO te chu mawhphurhna sang tak an nei ani tih hriaa theihtawp chhuah a \an lo la turin a ngen a. Kanhmun khawtlang hruaitute te chuan Reang (Bru) Tripura Camp a\anga vote thlak tur a lokal te chu thinlung tak a an lo lawm tur thu leh anmahni lo lawm nan Mizoram chinah Welcome Gate lo siam an tum thu an sawi ve bawk.
Tripura-a Bru Camp-ah hian Mizoram khua leh tui, Mizoram Assembly Constituency 9 a Electoral roll a hming chuang (vote nei) mi 11,968 an awm mek a, Election Commission of India in Bru Tripura Camp-a awm ten Mizoram chhungah ngei vote an thlak tur a ni, a tih angin tun thla ni 28 a MLA inthlan a vote an thlak theihna turin Kanhmun khuaah Temporary Polling Station sak mek a ni a, Tripura Bru Camp ah hian Mizoram Constituency 9 a mi an awm avangin an vote thlakna tur Temporary Polling Station 15 siam a ngai a, Kanhmun khelmual-ah Mamit District Constituency 3 te tan Polling Station 9 leh Indoors Stadium-ah Kolasib District leh Lunglei District Constituency te tan Polling Station 3 ve ve ruahman a ni a. Reang(Bru) Tripura Camp a\anga Kanhmun khua-a vote thlak tura an rawn kalna motor te chuan Mizoram leh Tripura inrina thleng a rawn thlah anga, heta \ang hian an vote thlakna tur hmun ahnaih tawh tho avangin ke in an kal dawn thung a ni.
Kanhmun hi ramri dep a awm anih vang leh Bru Tripura camp a mi te vote thlakna tur a nih avang hian venhimna \hazawka pek an nih theihnan CAPF company 2 (mi 200 vel) leh SAPF mi 30 vel duty tur a ruahman a ni a, Security duty turte hi Kanhmun Bazar chung leh Kanhmun YMA Hall-ah te an awm dawn a ni. Mizoram CEO hian Tripura-a Camp lian ber, Naisingpara pawh a tlawh zui leh nghal dawn bawk a ni.

Comments

Popular News (Last 30 Days)