Thenzawl-a Golf Course siam mekah hnathawh tur zaa 90 vel zawh a ni tawh

Sawrkar laipui-a Ministry of Tourism kaltlanga Thenzawl khuaa Golf Course siam mek chu kumin chhung hian zawh hman beisei a ni.

Integrated Development of New Eco-Tourism Destination hnuaia Thenzawl khuaa hmalakna te hi nimin khan Serchhip-a thuthar thehdarhtu \henkhat te chuan tlawhin helai hmuna an hmalakna hrang hrangte an en a. Helai hmuna Golf Course siam mek hi International Standard-a siam niin Graham Cooke in a designa an siam a ni a, sawrkar chuan Fore Consultant chu ruaiin hemi hnuaiah hian Eduface Pvt. Ltd. Infra Service chuan a siam hna hi an thawk a, helai hmuna hnathawh viltu Eduface Pvt. Ltd. Infra Service-a Project Co-Ordinator, Mimi Darnghilhlovi Chhangte chuan kum 2016 June 7 khan helai hmun  ah hian a lungphum phuma hmalak \an nghal a nih thu leh kumin December thla hian zawhfel hman an tum thu a sawi a. Helai hmuna Cottage 30 sak tur chu a hmanrua te Russia a\anga laa an sak zawh thawkhat tawh thu leh tunah hian Food Court leh Watch Tower turte chu siam mek a nih thu a sawi a. He Golf khelhna tur hmun-ah hian Grass an phun zawh thawkhat tawh thuleh tunah hian a \hen chu \o tawhin heng Grass an phunna hnuaiah hian Tui pipe phumin tui pekna \ha tak an siam thu sawiin, hei hi hmun pakhat a\anga control theih a nih dawn thu a sawi a. Heng tui an pek te hi luangral mai lovin a lakkhawmna siam nghalin, amah leh amah chu a inchawm zui thei tura an ruahman thu a sawi bawk.

Thenzawl Khawibelphul rama Golf Course hi cheng vbc. 99.99 senna tura sawrkar laipui ruahman niin Integrated Development of New Eco-Tourism Destination hnuaia hmarchhak biala hmalakna zingah a hma la \he ber nia an inngaih thu thawktute chuan an sawi a. Tunah hian hna an thawh tur a\anga za zela 90 vel chu zo tawha an inngaih thu pawh sawiin, khua (Hole) 18 awmna tur ramchhunga hetiang hmun tlemte zing ami a nih thu an sawi a. Helai hmun siamna atan hian Acre 114-a zau lak a nih thu sawiin, he hmalakna hi zawhfel a nih hnuah hian Mizoram chuan Tourist te tan hmun pawimawh tak a chan phah ngei an beisei thu an sawi bawk.

Helai hmuna thawktute chuan Integrated Development of New Eco-Tourism Destination hnuaia hmalakna hi Thenzawl, Zote South leh Reiek-ah te kalpui tura ruahman a nih thu pawh sawiin, Reiek leh Thenzawl-a hmalak mek a nih lai hian Zote South ami tur chu remchan zawkna avangin Thenzawl ramchhung, Serchhip a\anga kala Thenzawl khaw luh dawnah an sawn tak thu pawh an sawi a, helai hmunah hian Cottage 8 vel leh building dang te pawh sak tur a nih thu sawiin, tunah hian hmalakna chu kalpui mek a nih thu an sawi bawk.