MZP hruaitute Mizoram BJP Office-ah an leng

MZP chuan Assembly inthlanpui neih tur puala Political party hrang hrangte an kawmna kalzelah Inrinni khan BJP Mizoram Pradesh Office-ah lengin BJP Mizoram hruaitute nen inkawmna an nei a. MZP hruaitute hian BJP party-in ramri chungchang, Education, Chakma Foreigners chungchang leh Lokayukta chungchanga hmalak an tum dan leh hmachhawpte an zawt a ni.

BJP Office-a an lenna ah hian MZP President L. Ramdinliana Renthlei chuan Mizoram leh State dangte inrina chungchanga BJP Party hmalakna chungchang a zawhna chhangin BJP hruaitute chuan Mizoram leh State dang inrina mai bakah International Boundary zawng zawngah BJP chuan sipai tam tak dah an tum tih sawiin, Mizoram leh Assam ramri bik chu Mizoram-ah BJP-in sawrkarna an siam theih chuan rang taka sawi fel nghal theih an beisei tih an sawi a. MZP-in Zofate Chawlhbuk sak an tum chu BJP in theihtawp a puih an tum tih an hrilh a ni.

Education chungchangah BJP hruaitute chuan Mizoram School Education Department chu nasa taka thuam\hat a ngai tih sawiin, “Union Public Service Commission-a zirlaite tun aia tam thei ang ber kan inziah tlin theih nan BJP chuan hmalak a tum bakah Cadre hran kan neih theih nan hmalak kan tum a ni,’’ an ti a. Chakma Foreigners chungchangah BJP a sawrkar chuan Foreigners dapchhuahna atana pawimawh em em mai, Citizen Identification hman an tum niin an sawi. Lokayukta chungchang ah BJP Party hruaitute chuan sawrkarna an chan chuan Mizoramah Lokayukta hman nghal a ni dawn niin an sawi bawk.

BJP Office-a an len hma hian MZP hruaitute hi ZPM leh MNF Office-ah an leng tawh a, Vawiin hian Mizoram Pradesh Congress Committee (MPCC) Office tlawh lehin an hruaitute nen inkawmna an nei leh dawn a ni.