CEO a\angin SB. Shashank an sawn chhuak dawn; Bru-ten an Camp-ah vote an thlak dawn lo

Nimin tlai khan Election Commission of India (ECI) hotute Dy. Election Commissioner Sudeep Jain hova Aizawl-a lokalte chu All NGO Co-Ordination Committee hruaitute nen an inkawm a, ECI hotute chuan Tripura Camp-a Bru-te an awmna hmuna vote an thlak tir dawn loh thu leh Mizoram Chief Electoral Officer (CEO), SB. Shashank sawn chhuah a nih dawn thu an sawi.

NGO Coordination Committee in inthlan kaihhnawiha an thilphut hrang hrang te ngaihtuaha Mizoram-a rawn kal ECI Team te leh NGO Co-Ordination Committee hruaitu ten nimin a Aizawl New Secretariat Complex-a Meeting an neih zawha thuthar thehdarhtute zawhna chhangin, NGO Co-ordination Committee Chairman leh Central YMA President, Vanlalruata chuan hun engemawchen an lo ngen tawh angin Tripura Refugee Camp-a Bru-te chu an Camp-a vote thlak tir tawh loh ECI an intiam tih sawiin, "An camp-ah Bru-te vote thlakna atan EVM an dah tawh dawn lova, Mizoram chhungah ngei thlak tir an tum," a ti. Vanlalruata chuan CEO, SB. Shashank sawn chhuah chungchang pawh an thlen nawn leh tih sawiin, "ECI lam chuan SB. Shashank chuan dan bawhchhiatna a nei loh tih an sawi nain, Mizo mipuite hmakhua ngaiin, an rilru te an hriatthiam thu an sawi a, CEO thlak an intiam," a ti a, CEO chungchanga an hmalaknaah hlawhtlinga an in ngai thu a sawi.

CEO thlak hun tur ECI lamin an la sawi theih bik loh thu sawiin Vanlalruata chuan, "Sawrkar kalphungah chuan thil tihfel ngaite a tam thu an sawi a, chuvangin CEO thar ruat hun tur an la sawi thei lo a ni. CEO hi rawn dah hrih lo mah se, kan inthlan turah harsatna a awm lova, a pangngaiin a kal tho dawn a ni," a ti. Vanlalruata chuan Mizoram sawrkar-a Home Secretary sawn chhuah tak Lalnunmawia Chuaungo chungchang ah ECI hotute chu Mizo mipui duh dan an hriat vek tawh thu an hrilh nawn tih sawiin, "A rang lama Mizorama sawn leh turin kan thlen. A thu hrimah inthlan lai bak ECI-in thuneihna an nei lova, an sawn hun chhung pawh inthlan buaipui chhung atan chauh a ni," a ti a, inthlan zawhah Lalnunmawia chu Mizoramah a lokir leh mai tura an ngaih thu a sawi bawk.

NGO Co-ordination Committee hruaitute chuan Kolasib thil thleng chungchang pawh an thlen thu an sawi a, "Kolasib boruak a buaithlak a, Tripura Camp-a Bru-te Electoral Roll-a thun an nih danah mipuite an lawm loh avangin a rang lama ngaihtuah turin kan thlen," an ti. ECI hotute hnenah hian Kolasib DEO, Dr. Arun T-in Tripura Camp-a Bru te Electoral Roll-a a thun delete leh an nih theihna atana Roll thawnlet leh tura a ngenna leh Kolasib NGO in Dr. Arun T an duh loh thu an ziahna an pe a ni.

ECI team Mizorama lokalte hi Sudeep Jain bakah hian ECI Secretary, SB. Joshi leh Jharkhand CEO, Lalbiaktluanga Khiangte te niin Vawiin ah Mizoram an chhuahsan nghal ang.