Serchhip Bial-ah Zoram Thar atangin Rev. Dr. Zaichhawna Hlondo a ding dawn

Zoram Thar chuan kumin-a Assembly inthlanpui neih turah Mizoram-a Assembly Constituency 40-ah Candidate an neih dawn thu sawiin, Serchhip bial-ah an President, Rev. Dr. Zaichhawna Hlondo chu a din dawn thu an sawi.

Zoram Thar hian nimin khan Serchhip Bazar-a Jamela Hotel-ah MJA Member te kawmin he hunah hian an pawl Fin. Secretary, Upa Zosangliana chuan Assembly inthlanpui lo awm turah an pawl President, Rev. Dr. Zaichhawna chu Lalpa aiawha rawngbawla fatu chan changa Chhiahhlawh hna thawk turin Serchhip Bial-ah hian a ding dawn tih a sawi a. Hemi hnu hian Rev. Dr. Zaichhawna chuan mumang lamah pawh ala man ngai loh leh chakna leh tuina pawh nei lovin Serchhip Bial chu Lalpa in a hmangaih em avangin a aiawha ding tura a tih thu a sawi a. A pian hma, a Nu pumchhunga a awmlai a\ang tawhin Zoram chhanchhuak turin Pathian in a ruat tawh nia sawiin, Zoram mipuite manganna leh rumna a\anga chhanchhuah chu Pathian in a duh thu leh he Serchhip khawpui-a indona lo awm turah Lalpa lam \ang tura a rawn din thu a sawi a. “Politics-a indo-a Party Candidate te do turin ka rawn kal lo. Lalpa’n indona a puang a, Lalpa aiawha ding turin ka rawn kal a ni,” a ti bawk.

He hunah hian zawhna chhangin Zoram Thar hruaitute chuan kan hmaa Assembly inthlanpui lo awm turah Mizoram-a Assembly bial 40-ah Candidate siam an tum thu leh tunah hian mi 10 te an puan tawh thu sawiin, Rev. Dr. Zaichhawna Hlondo chu an dinna tur Bial an puan hmasak ber a nih thu leh Bial hrang hrangah kalin a tahtawla Candidate hi an puan zel dawn thu an sawi a. Mahni pumpui \anghma haia mipuite tih hrehawmna laka chhanchhuak tur te, Party Politics sawrkar titawpa mipui sawrkar, Lalpa sawrkar an din dawn thu te, Bial mipui zawng zawng sawrkar an din dawn thu te leh Lalpa tan chhiahhlawh ni tura inpein Lal nih an tumloh thu te an sawi a. Lalpa \ihna avanga an eiruk ve dawnloh thu leh thleibik leh duhsak bik an neih dawn loh thu leh mipuite khawngaihna dila an Vote an dil dawn loh thu leh Lalpa Pathian Vote vek tura an sawm zawk thu a sawi a. An Symbol atan Zungbun (Ring) an hman dawn thu leh hei hian Zoram Kristian te Lal Isua Krista nen inneihna thuthlung ah kan lut tawh dawn tih a entir thu an sawi bawk.

Zoram Thar in Serchhip Bial-a an din tir tur Rev. Dr. Zaichhawna Hlondo hi East Lungdar khawchhuak niin Oct. 15, 1963 khan a piang a, East Lungdar-ah hian Primary leh Middle School kalin Thingsulthliah H/S a\angn pawl 10 a exam thung a, kum 1990 khan Aizawl Theological College-ah Missionary Training a zo a. Synod Mission Board hnuaiah thawk \hinin kum 2002 khan MA a zir zo a, University of Birmingham a\angin PhD (Missiology) a zo bawk a ni. Zoram Thar hian Serchhip khawpui chhunga In tin-ah lutin \awng\aina hun hman an tum thu an sawi a, zanin hian Serchhip Hmar Veng YMA Hall-ah hun an hmang bawk ang.