Mizoram khawpui fai inelna neih ah Serchhip in lawmman pahnihna a dawng

UD&PA huaihawt Faina Hapta hawnna chu nimin khan Aizawl-ah neih niin NEDP Component pakhat, Climate change, Cleanliness and Sanitation Drive hnuaia hmalakna - Faina kawnga Mizoram khawpui 23 te intihsiakna result chu puan nghal a ni a. Serchhip chuan District khawpui fai inelna ah lawmman pahnihna a dawng.

Aizawl Vanapa Hall-a Faina Hapta hawnna leh khawpui fai lawmman semna hun khuallian nia hmanpuitu Finance Minister, Lalsawta chuan Faina kawngah mipui an harh \an nia sawiin, Faina leh hriselna te thil inzawm tlat, faina leh hmasawnna pawh thil inkungkaih tlat a ni, a ti a. NEDP hmalakna hnuaia Mizoram khawpui fai Ranking chu ngaihhlut a hlawh chho zel tih sawiin, Khaw fai ber te chuan an dinhmun ngai hauh tumin hma la chhunzawm zel se; khaw fai ber zinga lang phalo te pawhin lanphak tumin \an la leh zual se. Chu chu kan zaa kan \hatpui vek tur inelna a ni ang, a ti a. ‘Ti bawlhhlawh lo zawnga hmalak hi Ti fai zawnga hmalak tluk zetin a pawimawh’ a ti bawk.
Cleanliness Week hi Mizoram in kum 1977 khan faina lam inzirtirna atan a lo hmang tawh a. Kuminah pawh Cleanliness Week a hawnna pui ber Aizawl-a an neih ang hian khawpui lian deuh, Urban Town zawng zawngah te kar tluanin hman a ni dawn a ni. He hun chhung hian khawpui chhung \heuh faina lam inelna te bakah hnatlangte thawkin mahni khua \heuhah hma lak vek tum a ni.
NEDP hmalakna, Climate Change, Cleanliness and Sanitation Drive hnuaiah hian  Mizoram pum khaikhawmtu Mizoram Sanitation Task Force din niin District  tinah District Sanitation Task Force leh Khawpui tinah Town Sanitation Task Force te din vek niin khawpui fai inelna hi kumin July 16 khan a hawnna neih a ni a. Category-I, District Hqrs. fai ber lawmman chu point 92 hmutu Lunglei in dawngin pahnihna lawmman chu Serchhip District in point 90 hmuin a dawng a, Mamit chuan point 82 hmuin pathumna an ni bawk.
Category-II khawpui dangte zingah Biate chuan point 94 hmuin pakhatna an hauh leh a, point 93 hmutu Zawlnuam chu pahnihna niin Lengpui in point 91 hmuin pathumna an ni bawk. A pumpui ah Biate chu pakhatna niin Zawlnuam chu pahnihna an ni a, Lunglei chu pathumna niin Lengpui chu pali na leh Serchhip chu panga na a ni bawk. Category I leh II a pakhatna te hian Rs. 100,000/- dawngin 2-na in Rs. 70,000/- leh 3-na in Rs. 50,000/- an dawng bawk.

Popular posts from this blog

PAN CARD an tih teh fo hi - Laldinpuia